Sesaun foto husi Knua Juventude Fila-Liman hafoin oferese formasaun planu negósiu inovadór ba joven sira. Foto/Natalino Costa.

DILI, 05 Novembru 2019 (TATOLI) – Formasaun iha Knua Juventude Fila-Liman  (KJFL) durante ne’e, prodús ona joven sira hamutuk 37 ne’ebé kria ona negósiu inovadór iha área agrikultura, oinsá halo produsaun ba kafé.

Rezultadu husi formasaun ne’e mak formandu ida foin daudaun manán prémiu esportasaun 2019 husi TradeInvest Timor-Leste.

“Joven 37 maioria halo negósiu iha área agrikultura no turizmu, ami kontinua fó kapasitasaun ba ita-nian joven sira liuhosi oinsá halo negósiu inovativu hodi sira iha negósiu rasik no bele fó serbisu ba ema seluk”, Fasilitadór Knua Juventude Fila-Liman, Bonifácio Lopes ba Ajénsia Tatoli iha Páteo, ohin.

Nia salienta formasaun ba juventude ne’e, Knua Juventude Fila-Liman ne’ebé parseria ho United Nation Development Program (UNDP) haree liu ba área temátika haat, hanesan agrikultura, turizmu, jestaun resiklajen no enerjia renovavel.

Hodi dehan liuhosi parseria ne’e, UNDP tau hela atensaun másima, oinsá halo diversifikasaun ba jestaun lixu, enerjia renovavel hodi dudu joven sira atu iha ideia inovadora hodi halo negósiu atubele fortalese joven sira bele kriativu liután.

“Ami ohin fó formasaun ba ita-nian joven sira iha área rua maka youth colab Timor-Leste no Generation Innovation Youth Colab, hodi nune’e sira bele hili área negósiu rua bainhira sira atu halo negósiu iha área temátika haat ne’ebé maka UNDP termina ona hanesan agrikultura, turizmu, jestaun resiklajen, no enerjia renovavel”, dehan tan.

Negósiu inovadór youth colab Timor-Leste hanesan joven sira ne’ebé maka iha ona negósiu antes, oinsá maka bele buka atu fortifika liután liuhosi Knua Juventude Fila-Liman ho kritériu ba aplikasaun sira ho idade 24 to’o 35.

“Knua Juventude Fila-liman nian ezisténsia hahú 2017, husi ne’e kedas ami hahú fó formasaun barak hodi fó apoia ba joven sira hodi muda problema sosiál ba oportunidade sira hodi sira bele kria serbisu ba sira-nia aan no ba iha ema seluk ho ida ne’e Knua Juventude Fila-liman konsege prodús ona joven na’in-37 ne’ebé kria ona sira-nian negósiu”, dehan tan.

Maske nune’e, Knua Juventude Fila-Liman ho UNDP to’o agora seidauk lori joven sira ba rai-li’ur relasiona ba negósiu inovadór, maibé ho formasaun ne’e maka bainhira joven sira hakarak aplika kategoria rua kona-ba negósiu inovativu youth colab Timor-Leste no Generation Innovation Youth Colab maka joven timoroan balun sei reprezenta Timor-Leste ba rai-li’ur.

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here