Ekipa konjunta Comissão Anti-Corrupção (CAC) CFP observa servisu Alfándega iha Postu Servisu Fronteira Motain Munisípiu Bobonaru. Imajen/Espesiál

DILI, 04 novembru 2019 (TATOLI) – Diretór Jerál Autoridade Aduaneira (AA/Alfándega) interinu, Julião J. Fernandes, hatete relasiona ba kazu droga ne’ebé kazál timoroan lori liu husi kontrolu Alfándega Batugadé no detata fali iha Bea Cukai Atambua-Indonézia, funsionáriu balun ne’ebé serbisu iha momentu ne’ebá halo ona transferénsia mai nasionál hodi hein prosesu investigasaun.

“Ba kestaun ne’e, daudaun iha hela investigasaun nia laran bainhira konklui mak entrega ba Komisaun Funsaun Publika (KFP)”, Diretór Jerál interinu ne’e hatete iha Parlamentu Nasionál, ohin.

Iha kuarta (29/05/2019) JSP ho nia kaben AS lori ai-moruk droga ka pílula hamutuk 4874 tau iha mákina impresora mutin tipu EPSON A4, maibé ekipa Alfándega ida ne’ebé halo pasa revista la detata no to’o liubá Alfándega Indonézia nian maka hetan no detein timoroan na’in-rua ne’e.

Ba kestaun ne’e, pesoál na’in hira mak momentu ne’ebá hala’o knaar no muda ona mai AA nasionál, Julião Fernandes friza seidauk iha númeru fiksu, maibé iha pesoál lubuk ida. “Ita hein prosesu investigasaun konklui mak ita hatene númeru funsionáriu hira”, katak.

Nune’e, Diretór Jerál internu ne’e salienta Ministériu Finansa liuhosi Alfándega iha ona polítika kada tinan ida no rua halo mudansa ba funsionáriu sira.

“Iha mudansa ona ba pesoál hotu-hotu ne’ebé mak kle’ur ona iha fronteira no nasionál ida ne’e hanesan planu ida ne’ebé kada tinan ida no rua sempre halo”, nia dehan.

Antes ne’e, ekipa konjunta Komisaun Anti Korrupsaun (KAK) ho KFP observa serbisu Alfándega iha fronteira Motain, Munisípiu Bobonaru.

“Prosesu ne’e agora iha hela investigasaun nia laran no hein prosesu dokumentu mai husi Alfándega. Ha’u espera iha tempu badak Alfándega sei enkamiña mai KFP para bele haree kle’an liután hodi justifika ne’ebé husi parte irregularidade ruma funsionáriu sira inklina ba prosesu kazu ne’e ka lae”, dehan Komisáriu KFP ba Asuntu Dixiplinár, António Freitas.

Relasiona problema ne’e, ekipa konjunta Komisaun Anti Korrupsaun ba Asuntu Prevensaun no Sensibilizasaun, Espesialista Anti-Korrupsaun (EAK), KFP, Provedór Direitu Umanu no Justisa (PDHJ, sigla portugés) Rejionál Bobonaru, observa Postu Servisu Fronteira Motain, Nunura-Tunubibi iha Bobonaru, iha sesta-sábadu (05-06/07/2019) liubá nota Alfándega Motain menus rekursu iha tékniku uza mákina raiu-x hodi kontrola sasán sira ne’ebé konsidera kontra bandu.

Tuir Lei Funsaun Públika, bainhira funsionáriu ida envolve iha kazu krime hanesan fasilita droga mai Timor-Leste sei demite husi knaar.

Notísia relevante : Alfándega Investiga Hela Kazu Droga Ne’ebé Liu Hosi Fronteira

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here