Ilustrasaun kona-ba Infesaun vias respiratória ho pneumonia

DILI, 04 novembru 2019 (TATOLI)- Infesaun vias respiratória ho Pneumonia nu´udar kazu moras ne´ebé mak rejistu aas iha Sentru Saúde Vera Cruz, durante setembru 2019.

Totál pasiente infesaun vias respitarória mak 1.722, pneumonia 35, moras kulit (dermatitis), 392 asidente tráfiku, 52 asidente seluk 68 no suspeitu sarampu 28.

Xefe Sentru Saúde Vera Cruz, Dulce Pinto perante media informa katak iha Sentru Saúde Vera Cruz ne´e nu´udar fatin internamentu no sira sei haree ba kategória pasiente sira ne´ebé mak presiza halo internamentu entaun pesoál saúde sira halo atendimentu iha fatin refere durante loron tolu.

“Ami observa sira-nia  sitausaun kuandu la di´ak entaun ami transfere ba Ospitál Nasionál Guido Valadares no ida ne’ebé mak diak ami bele atende, bele baixa (interna) iha ne’e  no alta,” dehan Xefe Dulce Pinto, iha nia kna´ar fatin, Sentru Saúde Vera Cruz, segunda ne´e.

Durante loron feriadu ba finadu, tuir ezekutiva ne´e katak sira rejistu pasiente sira ne’ebé asidente iha na´in lima no mós inan ne’ebé partu na´in ualu ho partu normál hotu

“Maibé,  iha partu mak problema ka komplikadu ruma ne’ebé mak fasilidade ne’e labele halo, ami tenke refere  ba iha HNGV,” nia haklaken.

PNEUMONIA NO INFESAUN VIAS RESPIRATÓRIA

Pneumonia nu´udar moras infesioza ne´ebé ataka pulmaun ne´ebé mak rezulta inflamasaun. Babain hanaran pulmaun molladu (bokon).

Tuir Organizasaun Mundiál Saúde (OMS), iha 2015, pneumonia hakotu ona kosok-oan 16% iha mundu.

Sintoma pneumonia

Me´ar beibeik no lapara, isin-manas, kosar, moras iha hirus-matan, dada iis araska, kaan atu haan tuun no fuan tuku-tuku maka´as

Prevensaun

Halo vasinasaun, defende sistema imunidade (deskansa sufisiente, konsumu hahán ho nutrisaun no prátika desportu rutina, limpeza (fase-liman), para fuma sigarru, evita konsumu bebida alkolika.

Enkuantu, infesaun vias respiratória ne´e nu´udar infesaun ne´ebé hamosu sintoma ba me´ar akompaña mós ho isin-manas. Moras ne´e bele afeta ba se de´it maibé liuliu ba labarik sira.

Sintoma infesaun vias respiratória

Me´ar, fani, inus-metin, kakorok moras, iis boot, isin-manas no ulun fatuk moras.

Prevensaun

Fase liman regulamente, uza lensu ka tisu hodi taka ibun bainhira fani ka me´ar atu evita hada´e moras ne´e ba ema seluk, konsumu hahán ho vitamina, liuliu vitamina C atu hasa´e imunizasaun isin-lolon, prátika desportu regularmante, para fuma sigarru no mós tuir vasina.

Jornalista : Felicidade Ximenes

Editór       : Rafy Belo 

HAKEREK NO HATÁN

Please enter your comment!
Please enter your name here