Ministra Finansa ein ezersísiu, Sara Lobo Brites, hamutuk ho Diretór Jerál Ministeriu Finansa, hala’o audiensia ho Komisaun C, D No E kona-ba OJE 2020. Imajen/TATOLI Egas Cristovao.

DILI, 04 novembru 2019 (TATOLI) – Ministra Finansa ein funsaun, Sara Lobo Brites, rekoñese katak ezekusaun Orsamentu Jerál Estadu (OJE) 2019 ho montante biliaun $1,4 mínimu tebes.

Maibé atuál Vise-Ministra Finansa ne’e dehan, Governu la haree ba kuantidade ezekusaun, más haree liu ba kualidade hodi ezekuta programa Governu nian.

Sara Lobo Brites deklara iha Parlamentu Nasionál (PN), ohin, bainhira hala’o audiénsia públika ho Komisaun C trata asuntu finansa públika, komisaun D trata asuntu ekonomia no dezenvolvimentu no komisaun E trata asuntu infraestrutura kona-ba ezekusaun OJE 2019 ho proposta OJE 2020.

“Finansiamentu ba despeza iha 2019, ne’ebé aprovadu iha Parlamentu Nasionál ho lei númeru 2/2019, 7 fevereiru, ho totál millaun $1,482 ho ninia ezekusaun to’o loron 31 outubru maka hanesan reseita doméstika, totál ezekusaun atinje ona porsentu 76 ou millaun $148 hosi estimativa millaun $198,6, levantamentu hosi Fundu Petróleu porsentu 3 hosi Rendimentu Sustentável Estimadu to’o 31 outubru foti ona millaun $420 ne’ebé levantamentu foin porsentu 35 hosi montante ne’ebé aprovadu hosi Parlamentu”, esklarese Sara Lobo Brites.

Governante ne’e esplika, ida ne’e diresaun jerál tezouru ninia jestaun kaixa ne’ebé sira jere kuidadu tebetebes ho natoon atu foti osan tuir nesesidade tanba tenke konta mós ezekusaun orsamentu ne’ebé maka la’o ladún aselera, entaun levantamentu to’o ohin seidauk foti hotu montante ne’ebé maka prevee fulan rua nia laran.

“Ministériu Finansa liuhosi diresaun jerál tezouru sei halo análize didi’ak, sei rekolla informasaun hothotu hosi ministériu sira atubele halo projesaun ida to’o fin dezembru osan hira maka presiza atubele halo levantamentu no informa ba Parlamentu Nasionál”, katak.

Aléinde ne’e, Sara Lobo Brites afirma Governu nia orsamentu mós prevee katak tezouru mínimu tenke millaun $200. “Ha’u hanoin ida ne’e sasukat ida ne’ebé konsidera iha fin du anu molok atu halo levantamentu hosi montante ne’ebé maka autorizadu”.

En termu empréstimu to’o 31 outubru atinje porsentu 38 ou millaun $33 hosi montante orsamentu ne’ebé aprovadu iha Parlamentu ho valór millaun $87, no ida ne’e sobre finansiamentu.

Kona-ba despeza totál ezekusaun to’o 31 outubru, atinje ho valór monetária porsentu 56.2 ou $833.478.

Despeza inkluindu obrigasaun atinje porsentu 64.8 ou ekivalente ona $959,611. Entretantu iha ona inísiu novembru, ideál ne’e, ezekusaun loloos tenke atinje mínimu porsentu 75, maibé agora sei ki’ik maka porsentu 56 no valór ne’e inklui finansiamentu hosi empréstimu nian.

“Hosi pontu de vista Governu nian katak embora ezekusaun ki’ik, maibé hanesan iha elaborasaun orsamentu ami elabora orsamentu ida ne’ebé maka liga ba planu anuál, entaun ezekusaun ami haree liubá rezultadu, ne’e duni sei la duni tuir ezekusaun ida atu gasta naranaran de’it, maibé sei haree liu ba rezultadu ne’ebé tenke atinje iha fin du anu”, katak Sara.

MF mós hahú ona atu implementa orsamentu tinan-tinan tenke enkuadra iha programa ba despeza tinan tolu nian, entaun iha tinan dahuluk karik ezekusaun la atinje porsentu 100 la’ós sasukat ne’ebé sei uza hodi redús fali orsamentu ba programa sira ne’ebé tenke implementa durante tinan tolu.

Governu muda ona abordajen hosi trend ida hodi haree ba ezekusaun tinan kotuk ba fali rezultadu ne’ebé maka tenke atinje durante ezekusaun orsamentu, maibé konserteza ida ne’e iha duni kestaun liga ho planeamentu karik orsamentu ne’ebé tau la sukat mós situasaun balu ne’ebé maka akontese ne’ebé lori tempu naruk liuliu prosesu aprovizionamentu, ou prosesu sira  mak kontribui ba ezekusaun orsamentu.

“Pur tantu situasaun ida ne’e maka Governu enfrenta hela, ami sei tenta melloria iha períodu sira tuirmai”, afirma.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here