Diretór Laboratóriu no Dosente Klínika Kafé Timór no East Timor Coffee Institute (ETCI), Adérito Nunes. Imajen Tatoli/António Gonçalves

ERMERA, 04 novembru 2019 (TATOLI) – Diretór Laboratóriu no Dosente iha Klínika Kafé Timór no East Timor Coffee Institute (ETCI), Adérito Nunes, hateten prosesamentu produsaun kafé iha Gleno fó opurtunidade ba estudante ETCI sira ne’ebé mak foti Fakuldade Agrikultura atu sira bele halo prátika.

“Iha ETCI estudante sira simu matéria porsentu 40 de’it maibé prátika mak porsentu 60 hodi nune’e estudante sira kuandu ramata sira-nia estudu bele prátika. Sira mós bele loke mesak sira-nia negósiu,” dehan dosente ne’e ba Agência Tatoli, iha ETCI Gleno, segunda ne’e.

Kafé ne’ebé uza iha fatin prosesamentu. Imajen Tatoli/António Gonçalves

Nia dehan, iha fatin prosesamentu kafé iha fasilidade produsaun ne’ebé sufisiénte ona hodi hodi prodúz, nune’e bele halo promosaun ba kafé iha ETCI Gleno hodi tama ona merkadu internasionál hanesan Austrália no Korea, enkuantu iha merkadu doméstika kafé ne’e kuaze barak no tama ona iha Dili ho kafé arábika orgánika.

Maske nune’e, tuir dosente ne’e iha prosesamentu bainhira atu implementa maka seidauk bele adapta ho teknolojia modernu.

“Ita atu kontinua de’it hanesan anteriór nian ne’ebé maka ita-nia avó sira uluk prodúz hela kafé no ita atu hatene ona oinsá atu hili, hamoos, fase, habai, fai no oinsá maka ita atu loke kafé ninia kulit”, nia akresenta.

Aleinde ida ne’e, Adérito Nunes dehan fatin ne’e hatudu mós ba estudante sira oinsá implementa kona-ba sona kafé tenke tuir temperatura nune’e bele hetan ninia kualifikasaun ne’ebé mak diferente.

Jornalista: Osória Marques

Editór: Xisto Freitas

HAKEREK NO HATÁN

Please enter your comment!
Please enter your name here