Ministru Defeza no Ministru Interiór Interinu, Filomeno da Paixão de Jesus. Imajen/Tatoli

DILI, 4 novembru 2019 (TATOLI)—Iha segunda ne’e, Ministru Defeza no Ministru Interiór Interinu, Filomeno da Paixão de Jesus hala’o soru-mutuk ho Primeiru-Ministru, Taur Matan Ruak iha Palásiu Governu hodi informa viajen ne’ebé nia sei hala’o ba Austrália atu partisipa iha konferénsia internasionál kona-ba kombate terrorizmu.

“Ohin, ha’u mai informa ba Primeiru-Ministru atu aban lorokraik (5/11) ha’u halo viajen ba Austrália hodi partisipa iha konferénsia ida kona-ba ‘no money for terrorism’. Ha’u ba ne’e hanesan responsável ba Ministériu Interiór nian,” ministru ne’e dehan.

Nia hatutan, Timor-Leste sei la ko’alia iha konferénsia ne’e maibé partisipa de’it. “Ita ba iha ne’ebá sei la ko’alia buat ida. Ita ba hanesan partisipa hodi rona,” Filomeno esplika.

“Ita tenke ba rona no asiste saida mak sira ko’alia iha ne’ebá bele lori fali mai ita túr hamutuk fali hodi hanoin ba situasaun Timor nian kona-ba ameasa terrorizmu ne’e oinsá—sa’e ka lae, tun uitoan ka oinsá. Ida-ne’e mak ita presiza tenke ba rona,” nia haklaken.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here