BAUCAU, 30 outubru 2019 (TATOLI)-Kazu violénsia doméstika hanesan kazu ne’ebé rejista ho númeru boot iha Polisia Nasionál Timor-Leste (PNTL) Eskuadra Postu Administrativu Venilale, Munisípiu Baucau.
Data estatístika kazu ne’ebé informa hosi Komandante PNTL Venilale, Sebastião Freitas, katak, kazu violénsia doméstika hamutuk mak rejista 13, tuir fali kazu ofensa simples tolu no tuir kazu sivíl hanesan disputa rai.
“Kazu hirak ne’e ami entrega ona Ministériu Públika (MP) hodi prosesa tuir lei mak vigora,” informa Komandante Polisia Eskuadra Postu Venilale, Sebastião Freitas, ohin, ba Ajénsia TATOLI iha salaun Administrasaun Venilale.
Kona-ba disputa rai no kazu sivíl simples seluk, parte polisia ho autoridade lokál sira halo mediasaun no rezolve tuir maneira tradisionál ne’ebé mak durante ne’e adopta iha postu nia laran.
“Kuandu ami rezolve problema ida Kona ba disputa rai sempre uza dalan mediasaun, maibé laiha solusaun husi problema entaun ita sei ba oin no rezolve tuir lei disputa rai,” hateten Sebastião Freitas.
Jornalista : Osória Marques
Editór : Francisco Simões
