Prezidente Konsórsiu Nasionál Manufahi, Adriano Corte-Real. Imajen Tatoli/Domingos Piedade

MANUFAHI, 30 outubru 2019 (TATOLI)—Prezidente Konsórsiu Nasionál Manufahi, Adriano Corte-Real informa katak semana oin hafoin finadu, sira-nia kompañia sei hetan pagamentu hosi Governu liuhosi serbisu hamutuk entre Ajénsia Dezenvolvimentu Nasionál (ADN) no Ministériu Obra Públika (MOP).

“Ha’u hanoin projetu hamutuk 143 mak Governu seiduk selu. Tanba ne’e, entre projetu hamutuk 143 ne’e, iha projetu hamutuk 93 mak Governu sei selu inklui projetu ne’ebé konstrui hosi Konsórsiu Nasionál Manufahi”, nia tenik ba Agência TATOLI iha nia kna’ar fatin, Suku Holarua, Postu Administrativu Same, Munisípiu Manufahi, ohin.

Adriano mós esplika katak Konsórsiu Nasionál Manufahi kompostu hosi veteranu na’in hitu, ne’ebé harii iha tinan 2014 no lidera hosi nia parte hanesan Prezidente Konsórsiu Nasionál Manufahi.

“Momentu ne’ebá, ami hetan projetu kedas hodi halo bronzo iha parte Same ninian. Dezde tinan 2014 to’o 2018 la hetan pagamentu no la hetan projetu ruma tanba impase polítika”, Adriano informa.

Iha biban ne’e, nia rekoñese katak orsamentu jerál Estadu (OJE) 2019 implika ba kompañia lokál sira ne’ebé iha munisípiu, tanba la halo pagamentu lalais. Nia haktuir, kompañia balun oras ne’e labele hala’o atividade tanba difikuldade ba orsamentu.

Tuir informasaun ne’ebé nia parte rona katak projetu ilegál hamutuk 50 mak Governu seidauk bele selu tanba laiha órden serbisu ka koñesimentu hosi ministériu relevante sira.

Adriano haktuir, iha Munisípiu Manufahi, projetu ilegál mós lubuk ida hanesan iha Welaluhu no Wedaberek. Maibe, ba kestaun ne’e, nia parte laiha koñesimentu tanba la’ós ninia kompeténsia.

Jornalista: Domingos Piedade Freitas

Editór: Xisto Freitas

HAKEREK NO HATÁN

Please enter your comment!
Please enter your name here