BAUCAU, 30 outubru 2019 (TATOLI)-Étnika dalen tolu; Makasae, Uaima’a ho Midiki iha Baucau Vila, rekomenda ba Ministériu Reforma Lejizlativu no asuntu Parlamentár (MRLAP) atu aselera prosesu elaborasaun Lei Kostumeiru ho Justisa Tradisionál atu bele fó kbiit legal ba prosesu justisa tradisionál.
Notísia Relevante : Lia Na’in husu MRLAP Elabora Lei Fó Kbiit ba Sira Rezolve Disputa iha Suku
Rekomendasaun ne’e sai hanesan inspirasaun ida di’ak no pozitivu tebes ba Governu tanba ne’e asesór MRLAP, Josh Trindade, garante sira nia parte sei halo esforsu atu bele aselera formaliza Lei Kostumeiru ho Justisa Tradisionál.
“Ha’u hanoin lia nain no autoridade suku sira nia inspirasaun furak tanba sira rasik hakarak aselera lalais ezbosu lei hodi garantia ba sira nia serbisu iha baze nu’udar autoridade ida,” hateten Josh Trindade, ohin, iha salaun Autoridade Munisípiu Baucau.
Objetivu hosi konsulta públiku ne’e atu rekolla dadus hosi lia nain no lider suku kona-ba justisa tradisionál oinsá prosesu tesi lia iha ida-idak nia fatin hodi nune’e informasaun hirak ne’e uza atu bele dezenvolve dokumentu polítika no sai hanesan ezbosu lei ka enkuadramentu legal ida hodi halo ligasaun entre justisa formal no justisa tradisionál.
“Tuir ha’u nia observasaun direita ba lider suku sira katak sira iha esforsu hodi prevene konflitu iha sira nia suku laran,” afirma Josh Trindade.
Jornalista : Osória Marques
Editór : Francisco Simões
