Governadór BCTL, Abraão de Vasconcelos. Imajen Tatoli/Egas Cristovão

DILI, 30 outubru 2019 (TATOLI) – Banku Sentrál Timor-Leste (BSTL) transfere ona orsamentu hamutuk millaun $420 hosi Fundu Petróleu hodi finansia Orsamentu Jerál Estadu (OJE) 2019.

“To’o fulan setembru, Banku Sentrál transfere ona orsamentu hamutuk millaun $420 hosi Fundu Petróleu atu finansia orsamentu Estadu”, Governadór BSTL, Abraão de Vasconcelos, informa ba Tatoli iha Parlamentu Nasionál, ohin.

Governadór ne’e hatutan, orsamentu ne’ebé BSTL transfere hosi totál OJE 2019 ne’e, Parlamentu Nasionál aprova no halo ona levantamentu, nune’e BSTL halo transferénsia.

Abraão de Vasconcelos salienta karik Governu husu tan atu Banku Sentrál transfere maka sei despaxa bazeia ba pedidu hosi ezekutivu rasik.

Antes ne’e, iha relatóriu Fundu Petróleu ne’ebé termina iha juñu 2019, Vise-Governadór BSTL, Venancio Alves Maria, relata mós katak osan ne’ebé sai iha trimestre ne’ebé remata iha fulan refere hamutuk millaun $224,11 ne’ebé millaun $220 haruka ba orsamentu Estadu no millaun $4,11 ba kustu jestaun.

Hodi mai to’o iha setembru 2019, transferénsia osan husi Fundu Mina-rai ho montante ne’e temi ona (millaun $420).

Totál OJE 2019 ne’ebé Prezidente Repúblika promulga mak biliaun $1,482 ne’ebé husi montante ne’e distribui ba kategoria saláriu no vensimentu millaun $214, bens (sasán) no serbisu millaun $472,9, transferénsia públika millaun $362, kapitál menór millaun $31,2 no kapitál dezenvolvimentu millaun $400,7.

Nune’e nia ezekusaun tuir Portál Transparénsia ne’ebé Tatoli asesu to’o ohin loron  mak porsentu 64.5.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here