Xefe Suku Samalari, Rui Magno Siqueira. Imajen/Osória Marques

BAUCAU, 29 outubru 2019 (TATOLI)-Xefe Suku Samalari, Postu Administrativu Baucau Vila, Munisípiu Baucau, Rui Magno Siqueira,  rekomenda ba Governu atu bele legaliza zona Fatumaca sai postu administrativu ida iha Munisípiu Baucau.

Zona Fatumaca kompostu hosi Suku Uailili, Gariuai, Samalari ho Buibau ho nia total aldeia 28 mak hanesan Suku Uailili iha aldeia 10, Gariuai (8), Samalari (4) ho Buibau iha aldeia 6. Total abitante hosi suku haat 15.127 kompostu hosi feto na’in 7.528 no mane na’in 7.599.

“Ami iha razaun fundamental ida hodi zona Fatumaca bele sai postu ida iha Munisípiu Baucau tanba bazeia ba istória rezisténsia nian,” hateten Xefe Suku Samalari, Rui Magno Siqueira ba jornalista TATOLI iha salaun Autoridade Munisípiu Baucau, segunda (28/10/2019).

Nia garante mós katak, zona Fatumaca iha nia poténsia rekursu umanu ho rekursu naturaís atu bele sustenta ninia mákina administrasaun nian hodi kontribui ba dezenvolvimentu iha postu laran.

Antes ne’e, autoridade sira iha zona Fatumaca mós halo ona konsulta públiku ho nia komunidade sira iha suku haat nia latan ne’ebé hetan apoiu maka’as husi komunidade sira hodi aseita ideia no rekomendasaun atu sai postu administrativu ida.

“Ami husu ba parte kompetente atu konsidera ami-nia rekomendasaun hirak ne’e,” hateten Rui Magno Siqueira .

Jornalista          : Osória Marques

Jornalista          : Francisco Simões

HAKEREK NO HATÁN

Please enter your comment!
Please enter your name here