DILI, 29 outubru 2019 (TATOLI) – Iha tinan 2020, Sekretaria Estadu Komunikasaun Sosiál (SEKOMS) iha hanoin atu aumenta tan orsamentu ba Sentru Formasaun Téknika iha Komunikasaun (CEFTEC-sigla portugués), nune’ bele haforsa liután servisu.
Reprezentante SEKOMS, Julio Gonçalves, hateten Governu iha ona hanoin hodi aumenta tan orsamentu ba CEFTEC iha tinan oin.
Xefe Gabinete ne’e haktuir, iha tinan 2019 CEFTEC hetan ona apoiu orsamentu hosi SEKOMS hamutuk $97.000, hodi fasilita formandu hamutuk 119, enkuantu ba tinan 2020 Governu hakarak hasa’e tan orsamentu ba $522.000, ne’ebé sei fahe ba kategoria tolu hanesan, saláriu no vensimentu, bens servisu no kapitál menór.
“Kategoria kapitál menór ne’e, atu bele mellora di’ak liután fasilidade formasaun sai di’ak liu atu nune’e ema sira ne’ebé tuir formasaun bele iha fasilidade”, dehan Julio iha Tower, Fatuhada, tersa ne’e.
Nia esplika, razaun Governu atu fó apoiu ba CEFTEC atu bele fó formasaun di’ak liu tan ba profisionál komunikasaun sosiál sira hosi mídia privadu, públiku no asesoria imprensa hosi liña ministériu no instituisaun sira seluk hanesan FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL), no seluk tan.
“VIII Governu Konstitusionál iha ona planu no hanoin atu muda CEFTEC hosi sentru formasaun ba Instituisaun Nasionál Formasaun, atu nune’e sira bele hakle’an no habelar nafatin sira nia atividade formasaun liuliu ba jornalista sira atu bele hatene di’ak liután halo unidade hakerek komunikadu imprensa, multimedia, gráfiku no mós vídiu dijitál” nia akresenta.
Jornalista: Hortençio Sanchez
Editór: Xisto Freitas
