Prezidente Autoridade Interinu Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM), Arsénio Paixão Bano. Imajen Tatoli/Egas Cristóvão.

DILI, 29 outubru 2019 (TATOLI)-Prezidente Autoridade Rejiaun Administrativu Espesiál Oecuse-Ambeno (RAEOA) interino, Arsenio Paixão Bano hato’o agradesimentu ba Governu sentrál liuhusi Ministériu Edukasaun, Juventude no Desportu (MEJD) tanba bele ona rezolve problema pagamentu ba saláriu retroativu profesór na´in 116.

“Ami kontente tebes kuandu esforsu ida ne’e akontese. Agradese ba Ministra Edukasaun hamutuk ho ninia ekipa realiza ona serimónia ida ne’e hodi ohin bele asina nota intendimentu ne’e,” hateten Arsenio Paixão iha Palásiu Governu, tersa ne´e.

Nia dehan, loos duni problema retroativu sai obstakulu boot ida durante ne’e iha RAEOA maibé hetan ona rezultadu di´ak. “Espera kooperasaun serbisu parte rua nian bele di´ak liután”.

Tuir nia, durante ne’e autoridade RAEOA esforsu mak´aas hodi buka meius oinsá atu rezolve neineik problema sira ne’e liuhusi esplikasaun atu motiva nafatin profesór sira hodi hein. “Iha kazu sempre hetan ninia solusaun”.

Prezidente interinu RAEOA, Arsenio Paixão Bano konsidera liuhusi akordu MoU (Memorandum of Understanding) ne’e nu´udar dalan di´ak ida ba futuru atu governu sentrál no RAEOA sei haforsa kooperasaun servisu ida adekuadu liután hodi haree mós nesesidade profesor sira iha Oecusse.

Nune’e mós Ministra Edukasaun, Juventude no Desportu Dulce de Jesus Soares ihaafirma katak ida ne’e mak prosesu ida ne’ebé akontese entre governu sentrál ho RAEOA maibé presiza tau iha konsiderasaun katak solusaun ne’ebé parte rua hatudu ona nu´udar dalan ida atu loke progresu foun.

“Ita-nia profesór sira fulan oin hetan ona sira nia direitu. Signifika ho pagamentu retrotivu ne’e bele motiva sira atu badinas servisu  di´ak liután,” konsidera governante ne´e.

Notísia relevante:MEJD Asina Nota Tranferénsia Pagamentu Retroativu ba Profesór RAEOA Na’in-166

Jornalista :Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here