Ministru Transporte no Komunikasaun, José Agostinho da Silva, hamutuk ho Prezidente interinu RAEOA, Arsénio Bano, audiénsia ho Komisaun C no E kona-ba OJE 2020. Imajen/Florencio M. Ximenes.

DILI, 29 outubru 2019 (TATOLI) – Ministru Transporte no Komunikasaun (MTK), José Agostinho da Silva, informa MTK arrekada (rekolla) reseita hamutuk millaun $6,7-resin hodi hatama ba kofre Estadu iha tinan ne’e.

“Ami konsege rekolla reseita husi diresaun sira ne’ebé eziste iha Ministériu ne’e nia laran hamutuk millaun $6,7-resin”, Ministru José Agostinho afirma iha ámbitu audiénsia ho Komisaun C no E kona-ba Orsamentu Jerál Estadu (OJE) 2020 iha plenária Parlamentu Nasionál, ohin.

Ministru José Agostinho dehan reseita sira ne’e rekolla husi diresaun administrasaun sira direita no indireta.

“Pur tantu orsamentu ne’ebé mak aloka iha tinan ne’e (2019) millaun $7,6, maibé ami konsege rekolla fali reseita millaun $6.7”, katak.

Prezidente Bankada Partidu Demokrátiku, António da Conceição, apresia ba MTK tanba konsege rekolla reseita hodi reembolsa fali orsamentu balun ba kofre Estadu.

“Ha’u husu ba ministériu atu kontinua mellora servisu administrativa sira no estasionamentu sira atubele hatama reseita ba kofre Estadu”, sujere.

Entretantu, Prezidente Komisaun E asuntu infraestrutura, Abel Pires, dehan, atu hatama reseita barak liu, MTK tenke fó atensaun séria ona ba Diresaun Nasionál Transporte no Terrestre (DNTT) atu fó atendimentu di’ak ba sidadaun sira.

“Ita husu tenke rezolve ona atu plat, karta kondusaun tenke iha no fasilita ema halais atu fasil trata dokumentu tanba fó rendimentu barak ba Estadu”, nia fó hanoin.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here