Saúde Orál. Ilustrasaun

DILI, 29 outubru 2019 (TATOLI)-Ministériu Saúde (MS) liuhusi Departamentu Moras La Hada´et fó hanoin ba komunidade liuliu sidadaun ida katak saúde orál ne´e importante tebes tanba ne´e atu kuidadu, kose nehan loron ida dala rua.

“Kumpre nafatin ijiene saúde orál mak primeiru kose nehan mínimu loron ida dala rua hanesan dader hafoin matabisu ho kalan molok toba,” hateten Xefe Departamentu Moras La Hada’et, Frederico Bosco ba Ajénsia TATOLI iha nia kna’ar fatin, eis SPK (Sekolah Pendidikan Kesehatan) Lahane, Dili, ohin.

Segundu, tuir xefe departamentu ne´e katak husu nafatin ba komunidade atu hadook aan husi ábitu sira hanesan fuma tanba fuma afeta direita ba saúde orál no mós labele mama malus ka songe ne’e mós afeta direita ba kualidade saúde orál.

Terseiru, husu komunidade para konsumu hahán sira ne’ebé iha saudavel liuliu ida ne’ebé la´ós midar barak hodi fó fila fali impaktu saúde orál ne’e rasik hanesan masin midar ne’ebé barak mak ita konsumu demais depois la kose nehan ho didiak ninia impaktu direitamente ba iha saúde orál ne’e rasik.

Xefe Departamentu Moras La Hada´et, Frederico Bosco esplika, saúde orál hanesan sistema dijestivu ida ne’ebé komesa husi ibun mak ba nehan no ba kabun tanba ne’e mak saúde oral importante tebes ba saúde ema idaidak nian.

Saúde Orál mak hanesan problema ida ne’ebé ita hotu tenke preokupa tanba nutrisaun kualidade vida no hahán sira ne’e liga ho saúde orál tanba hahán, bebida sira ne’e tama husi ibun mak ba isin-lolon.

“Ministeriu Saúde nia observasaun haree katak presiza reforsa nafatin asaun promosaun no prevensaun no ao mesmo tempu prepara mós fasilisade saúde atu bele responde ba iha kestaun ne’ebé liga ho saúde orál,” dehan Xefe Departamentu Moras La Hada’et, Frederico Bosco.

Nia informa, durante ne´e, Ministériu Saúde, em termos de rekursu umanu, iha 2018, la sufisiente ba iha saúde orál ninian maibé iha tinan ida ne´e rekruta tan ita nia profisonál saúde sira liuliu tékniku dentáriu sira atu komplementa liután profisionál sira ne’ebé uluk servisu to´o ba iha sistema nasionál saúde.

“Ita haree katak ita fó orientasaun ba dentaria sira para sira mós komprende didi´ak ba program ida ne’e liuliu oinsá mak atu implementa di’ak ba iha sentru saúde sira ne’e,” dehan xefe ne´e.

Xefe Departamentu Moras La Hada’et, Frederico Bosco friza tan katak saúde orál bainhira la saudavel nia impaktu primeiru kualidade d vida ema nian.

Se ita ko’alia kona-ba kualidade vida, ita mós haree ba kualidade alimentasaun ema ida nian. Bainhira ema ida ho problema nehan ho problema orál iha ibun laran ruma entaun nia labele han ho di’ak siginfika hahán sira ne’e bele impaktu ba iha nivel nutrisaun no ema ne’ebé problema ho nehan sira, nia labele nata hahán sira ne’e ho di’ak no labele alimenta ho di’ak entaun nivel nutrisaun bele afeta ba ema nia saúde.

Saúde orál mos liga ba iha relasaun sosiál ezemplu ema ne’ebé iha saúde orál di’ak liuliu ijiene di’ak, nia nehan sira ne’e estrutura di’ak bele ajuda nia bele komunika ema ho di’ak hanesan nia fiar aan bele komunika ho ema no nia besik ema mós la taka ibun tanba nia ibun laran la iis; buat sira ne’e impaktu ba saude orál boot tebes.

Afeta ba kualidade vida no iha tempu hanesan ba mós relasaun sosiál tanba ne’e mak Ministeriu Saúde konsidera nafatin saúde orál ne’e hanesan aspetu ida ne’ebé importante atu nune’e ita tau matan para bainhira saúde orál mós di’ak ita bele asegura mos kualidade vida ema ida nian.

Xefe Departamentu Moras La Hada’et haklaken saúde orál nia benifísiu mak bainhira ema ida saudavel mak ema ida alimenta di´ak.

Primeiru, hahán sira ne’ebé nia atu konsumu ho di’ak segundu liga mós ba ninia relasaun sosiál ho ema hanesan ibun laran la iis no ninia estrutura nehan sira kompletu no laiha problema entaun nia bele ko’alia ho ema nia bele fiar aan no fasilita mós komunikasaun ho relasaum ema ho relasaun sosiál ho di’ak liután.

“Ida ne’e mak saúde orál nia benifísiu ne’ebé iha ema idaidak,” Xefe Departamentu Moras La Hada´et, Frederico Bosco fó hanoin.

Iha fatin ketak, Xefe Departamentu  Frederico Bosco  informa ba jornalista sira iha whorkshop kona-ba orientasaun pakote servisu saúde orál ba tekniku dentária sira katak MS rekruta ona dentária na´in 47 maibé tuir nia realidade presiza nafatin  iha munisípiu sira liuliu dedikadu ba iha área orál ninian tanba oras ne’e dadaun iha kada sentru saúde ne’e balun iha infermeiru dentista, balun la iha,  enfermeiru dentista barak mak iha sentru internamentu  iha munisípiu sira maibé iha sentru saúde sira barak mak seidauk.

“Programa saúde orál ne’ebé liga ba iha kuidadu saúde primária, sekundária, tersiaria ne’ebé iha Timor-Leste programa ne’e la’o oinsá ita bele introdús ba tékniku dentaria sira tanba foin mak rekruta sira hanesan nu’udar funsionariu públiku,” dehan Xefe Departamentu Moras La Hada’et, Frederico Bosco, iha salaun Institutu  Nasionál Saúde Comoro, segunda (28/10/2019).

Nia adianta, profisionál saúde sira ne’ebé oras ne’e daudaun servisu ona iha baze tanba ne’e ita seidauk introdús programa saúde ba sira tanba ne’e mak ita bolu fila fali sira atu nune’e sira bele komprende no kuidadu saúde orál ne’e iha sira-nia servisu fatin hodi sira tenke fornese ba ita-nia populasaun sira.

“Ita ko´alia kona ba saúde orál mós signifika parte determina iha ema nia saúde tanba ne’e mak ita presiza duni atu habelar servisu ida ne’e ba to’o iha  baze liuhusi alokasaun rekursu umanu no enfermeiru dentista sira banhira sira iha koñesimentu di´ak sira implementa iha baze ne’ebá,” hateten Xefe Departamentu Moras La Hada’et.

Hodi hatutan: “Iha koñesimentu báziku liu kona-ba anatomia nehan ninian maibé sira-nia servisu loloos mak tenke disponsabiliza  laboratóriu ba sira atu nune’e sira bele servisu hamutuk ho doutor nehan sira maibé enfermeiru kapasitadu atu halo servisu báziku sira hamoos nehan, identifika nehan ne’e nia problema saida depois sira fó manajement (jestaun) báziku hanesan hamoos nehan sira metan ne’e no mós fokit nehan”.

“Infelizmente oras ne’e dadaun ita-nia laboratóriu seidauk iha maibé ita iha ona koñesimentu báziku kona-ba nehan nian entaun di´ak mós banhira ita fahe didi´ak ita-nia programa saúde orál ne’ebá sira atu nunee sira bele implementa tuir duni sistema nasionál saúde ne’ebé estabelese ona iha ita nia rain,” nia konsidera.

Xefe Departamentu Moras La Hada’et, Frederico Bosco, haktuir médiku dentista  no enfermeiru dentista ita sei minimu tebes mezmu universidade rai laran ne’ebé prodú dentista barak  tanba ne’e mak ita-nia sistema nasionál saúde hatudu katak enfermeiru dentista sufisiente tanba ita ko’alia kona-ba saúde orál ita mós ko’alia kona-ba kuidadu saúde primária, sekundária tersiaria, tenke iha nivel hanesan ho Ospitál Referál no Opsitál Nasionál Guido Valadares liuliu  sira tenke iha espesialista ne’ebé ita kategoriza hanesan sub-espesialista infelizmente ita seidauk iha.

Tanba kazu kona-ba dentária barak ita tenke refere ba li´ur bainhira kazu sira hanesan komplikadu ona tanba ita-nia rekursu umanu seidauk iha. “Ministeriu Saúde oras ne’e daudaun halo hela planu estratéjiku ba tinan lima maibé seidauk finaliza, iha hela konsultasaun nia laran, seidauk aprova iha konsellu dirasaun no ita seidauk implementa maibé ita rai hela para oinsá ita atu responde ba nesesidade,” nia informa.

Partisipa iha iha whorksop ne’e husi xefe departamentu rekursu umanu, xefe departamentu moras la hada´et,  profisionál saúde  sira liuliu tékniku dentária sira.

 Jornalista : Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here