Sekretáriu Estadu Formasaun Profisionál no Empregu, Julião da Silva (karuk) no Sekretáriu Ezekutivu FDCH, Isménio Martins da Silva (loos) foto hamutuk iha serimónia asina MoU sobre Programa Estájiu iha Sekolah Tinggi Pariwisata Bali, iha Salaun SEFOPE Kaikoli, Dili, Segunda (28/10/2019). Imajen/TATOLI.

DILI, 28 outubru 2019 (TATOLI) – Sekretáriu Estadu Formasaun Profisionál no Empregu (SEFOPE) asina memorandu entendimentu (MoU, iha inglés) ho Sekolah Tinggi Pariwisata Bali no Otél Novu Turizmu hodi apoia formasaun ba benefisiáriu na’in-10 hodi prepara sira liga ba merkadu serbisu iha área ospitalidade nian.

Diretór Jerál SEFOPE, Paulo Alves (karuk) no Diretór Sekolah Tinggi Pariwisata Bali, I Wayang Sunarsa (loos), entrega dokumentu ne’ebé asina sobre Programa Estájiu iha Sekolah Tinggi Pariwisata Bali no Novu Turizmu, iha Salaun SEFOPE Kaikoli, Dili, Segunda (28/10/2019). Imajen/TATOLI.

Diretór Jerál SEFOPE, Paulo Alves, hatete orsamentu ba formasaun ne’e mai husi Orsamentu Jerál Estadu 2019 liuhusi Fundu Dezenvolvimentu Kapitál Umanu (FDCH, sigla portugés) ho montante rihun $51 ho durasaun ba formasaun fulan neen.

“Atu ita prepara joven timoroan sira liga mós ba indústria serbisu rai-li’ur nian. Ita serbisu hamutuk ho Governu Austrália no área ne’ebé ita haruka ba serbisu mós iha ospitalidade nian. Durante ne’e ita-nia númeru seidauk barak bá serbisu iha área ospitalidade iha Austrália tanba ita seidauk bele halo kompetisaun ho nasaun sira Indo-Pasífiku”, Paulo Alves afirma iha serimónia asinatura iha Kaikoli, ohin.

Jerente Jerál Novu Turizmu, Clementino Gonçalves, hatete program ida ne’e liuhusi estudu naruk no bazeia ba hili ema na’in-10 atu tuir treinamentu iha Bali tuir área servisu ne’ebé mak Novu Turizmu presiza.

“Ne’ebé maun-alin ne’ebé mak tuir formasaun ne’e, aprende didi’ak para lori matenek ne’e mai hodi hatutan fali ba maluk sira ne’ebé mak iha”, nia sujere.

Hodi hatutan hafoin formasaun, formandu sira ne’e sei serbisu iha Novu Turizmu tuir pedidu ne’ebé iha no Otél Novu Turizmu sente onradu hetan oportunidade ida ne’e.

Diretór Nasionál Formasaun Profisionál, Mateus dos Santos Talo, salienta programa ne’e liuhusi estájiu nasionál no internasionál nune’e SEFOPE liga ho parseiru sira oinsá mak bele simu graduadu husi sentru formasaun akreditadu, entaun Novu Turizmu sei fasilita hodi emprega direta benefisiáriu bainhira remata ona estájiu iha Bali.

“Ami taka ona informasaun iha mídia oinsá mak bele halo prosesu rekrutamentu depois benefisiáriu sira mai hatama dokumentu iha SEFOPE, prosesu selesaun ami sei entrega ba Novu Turizmu”, afirma.

Tanba semana ne’e, halo ona prosesu selesaun husi Novu Turizmu hafoin finaliza sei haruka benefisiáriu sira bá Bali iha finál novembru ne’e.

Programa estájiu ne’ebé halo husi SEFOPE serbisu hamutuk ho Novu Turizmu ho STP Bali ne’e, formandu timoroan sira sei bá aprende teoria fulan tolu no prátika mós fulan tolu.

Diretór STP Bali, Dewa GN Byomantara. Imajen/TATOLI.

Diretór STP Bali, Dewa GN Byomantara, agradese ba Governu Timor-Leste tanba fó fiar hodi eduka joven timoroan sira iha área ospitalidade liuliu iha otelaria, espesífiku liután iha área tolu mak iha dapur, servidór, no housekeeping.

Nia esplika sobre treinamentu ne’e, fulan tolu iha kampus no fulan tolu seluk sei halo estájiu iha otél sira. “Se ita ko’alia sobre skill de’it, ne’e sufisiente iha fulan tolu iha nivel báziku. Tanba ne’e ha’u husu ba ema sira ne’ebé rekruta joven sira ne’e atu fó prioridade liu iha atitude. Ema ne’ebé sei haruka bá Bali ne’e iha espíritu servidór ka lae? Ida ne’e mak difisil atu ami hanorin tanba presiza tempu, depois mak língua inglés tanba iha turizmu ne’e labele husik husi lian internasionál mak inglés ne’e no tuirmai mak aparénsia”, nia sujere.

Diretór ne’e haktuir, padraun edukasaun ne’ebé STP uza iha Indonézia ne’e tuir internasionál nian no padraun dahuluk ne’ebé uza mak ASEAN ne’ebé ratifika ona, depois akredita ona husi institutu edukasionál iha London-Inglaterra, husi Universidade Vitória iha Melbourne-Austrália no mós akredita husi UNWTO ka Organizasaun Mundiál Turizmu iha kualidade edukasaun turizmu nian.

Asinatura memorandu ba formasaun ne’e husi SEFOPE, Julião da Silva, Sekretáriu Ezekutivu FDCH, Isménio Martins da Silva, Jerente Jerál Novu Turizmu, Clementino Gonçalves, no Diretór STP Bali, I Wayang Sunarsa.

Iha ámbitu asinatura ne’e, Sekretáriu Ezekutivu FDCH, Isménio Martins da Silva, hato’o parabéns ba SEFOPE no prontu atu apoiu polítika ida ne’ebé Sekretáriu Estadu halo.

Jornalista : Maria Auxiliadora

Editór        : Rafy Belo

HAKEREK NO HATÁN

Please enter your comment!
Please enter your name here