Sekretáriu Estadu Juventude no Desportu, Nélio Isaac Sarmento. Imajen/Tatoli

DILI, 28 outubru 2019 (TATOLI) – Sekretáriu Estadu Juventude no Desportu, Nélio Isaac Sarmento, hateten konstrusaun Estádiu Dili kontinua paradu tanba kompañia ne’ebé kaer obra ne’e iha problema finanseiru.

“Estádiu ne’e seidauk la’o tanba kompañia rasik iha problema iha kapasidade finansiamentu atu konklui obra, no mós prosesu administrativu balun ne’ebé hahú hosi inísiu atu halo obra ne’e iha hela dúvida. Tanba ne’e maka to’o tempu ha’u mai husu halo investigasaun ba obra ne’e rasik no deteta katak iha kestaun balun tenke hadi’a duni”, dehan Nélio ba Agência Tatoli iha resintu Parlamentu Nasionál (PN), segunda ne’e.

Governante ne’e haktuir, problema ne’ebé akontese ba Estádiu Munisipál Dili husi inísiu hahú obra.

“Problema ne’e hosi inísiu kedan, liuliu ba orsamentu adisionál ba harii tribun. Momentu ne’ebá kompañia la foku atensaun liubá kontratu orijen ne’ebé Sekretaria Estadu Juventude no Desportu (SEJD) husu ba nia atu hadi’a tribun esensiál, maibé kompañia rasik la finaliza. Nia ba finaliza uluk ida adisionál ne’e maibé seidauk halo mudansa iha kontratu orijen. Entaun kestaun ida-ne’e maka halo hela problema hodi demora to’o ohin loron”, nia akresenta.

Nélio informa, semana oin SEJD sei haruka karta ida ba Konsellu Administrasaun Fundu Infraestrutura (KAFI) atu bele realiza sorumutu estraordináriu, nune’e bele ko’alia hodi buka solusaun ba obra refere hafoin bele fó sai fali rezultadu ba públiku.

“Ita sei hala’o reuniaun extraordináriu ida ho KAFI atu haree kontinua nafatin ho kompañia ne’e ka iha asuntu seluk maka presiza atu debate. Ida-ne’e maka prosesu la’o hela no hein de’it ko’alia ho KAFI atu haree ba oin”, nia subliña.

Konstrusaun ba Estádiu Dili, hahú iha 2015 hosi kompaña lokál, Marino Entreprise, Lda ho osan hamutuk millaun $1,5.

Husi obra ne’e Governu konsege selu ona pursentu 70, maibé to’o ohin loron seidauk finaliza.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here