Sesaun plenária Parlamentu Nasionál. Imajen/Tatoli

DILI, 28 outubru 2019 (TATOLI) – Membru Parlamentu Nasionál (PN), husi Bankada Partidu Libertasaun Populár (PLP), Congresso Nacional Reconstrução de Timor (CNRT) no Frente Revolusionária Timor-Leste Independente (FRETILIN), preukupa orsamentu viajen estranjeiru Ministériu Obra Públika (MOP), ne’ebé propoin iha Orsamentu Jerál Estadu (OJE) 2020, hamutuk $329.000.

“Ha’u haree ita boot sira nia proposta ba Orsamentu 2020, prevee viajen estranjeiru ba Ministériu Obra Públika boot tebes señor Ministru. Ha’u haree osan viajen estranjeiru boot liu maka Diresaun Orsamentu no Finansa iha ministériu ne’e”, tenik Deputada Bankada PLP, Maria Angelina Sarmento, iha audiénsia konjunta Komisaun C,D,E no F, iha sala plenáriu, segunda ne’e.

Vise-Prezidente PN haktuir, iha tinan 2019, orsamentu viajen estranjeiru MOP hamutuk $150.000, maibé iha tinan 2020 sa’e pursentu 100.

“Ha’u haree iha planu asaun la reflete no la kontempla buat ruma ba viajen estranjeiru. Atu ba iha ne’ebé no atu hetan saida?”, akresenta Deputada Bankada Governu ne’e.

Deputada Angelina observa, iha proposta MOP, orsamentu viajen estranjeiru ba Diresaun Orsamentu no Finansa hamutuk $80.000, tanba ne’e nia fó hanoin ministériu ne’e atu bele konsentra hodi rezolve situasaun kompleksu sira iha rai-laran.

Parte seluk, Deputadu Bankada FRETILIN, Fabião de Oliveira, kestiona maka’as orsamentu ne’ebé MOP prevee ba viajen estranjeiru.

“Ba atu halo saida? Bainhira ita hakarak ba fila tenke lori rezultadu. Ami deputadu sira nia viajen estranjeiru mós ko’a hotu”, dehan Deputadu Bankada Opozisaun ne’e.

Nune’e mós Deputadu CNRT, Marcos Xavier, konsidera orsamentu ba viajen estranjeiru la presiza boot tanba iha nesesidade barak maka presiza rezolve.

“Ami iha ne’e osan viajen estranjeiru ko’a ba zero. Agora ne’e atu ba halo saida?”, nia kestiona.

Jornalista : Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here