Ministru Agrikultura no Peska, Joaquim José Gusmão dos Reis Martins.

DILI 28 outubru 2019, (TATOLI) – Ministru Agrikultura no Peska, Joaquim José Gusmão dos Reis Martins, hateten guarda florestál falta tebes ekipamentu nune’e difikulta atu halo servisu di’ak liután hodi halo prevensaun ba inséndiu.

“Ita-nia guarda floresta sira uitoan de’it no sira-nia ekipamentu ida mós laiha, mínimu liu sira tenke iha netik rádiu ida, nune’e sira bele kontaktu ba seguransa sira, maibé rádiu de’it laiha no mós motór hodi ajuda sira kontrola di’ak liután hodi halo prevensaun ba akontesimentu inséndiu”, hateten Joaquim José Gusmão ba Tatoli iha Parlamentu Nasionál, ohin.

Aléinde falta ekipamentu, pesoál guarda florestál mós menus tebes, maibé orsamentu ba ida ne’e iha tinan oin laiha.

Tanba ne’e, atu halo prevensaun hodi labele akontese inséndiu iha fatin-fatin, Ministériu Agrikultura no Peska (MAP) sei servisu hamutuk ho Sekretáriu Estadu Protesaun Sivíl (SEPS).

“Iha OJE 2020 ami la tau orsamentu tanba orsamentu lato’o duni, maibé ami nafatin koordena ho instituisaun relevante atu halo prevensaun ba situasaun sira ne’e”, dehan Joaquim.

Orsamentu ne’ebé Governu aloka ba Ministériu Agrikultura no Peska iha proposta lei Orsamentu Jerál Estadu 2020 mak hamutuk millaun $17 ne’ebé sei fó prioridade ba reabilita irrigasaun iha territóriu no hasa’e produsaun hare.

Ministru ne’e salienta, daudaun pesoál guarda florestál hamutuk 82 ne’ebé koloka iha territóriu Timor-Leste no númeru ne’e seidauk sufisiente, no tuir loloos guarda florestál atu guarda di’ak liután ai-laran ne’e tenke to’o rihun ida.

Kona-ba inséndiu ne’ebé akontese, tuir dadus provizóriu ahi han uma iha munisípiu sia (9) hamutuk 664 ne’ebé komesa kedas iha 02 to’o 21 outubru ne’e, ne’ebé halo komunidade barak sofre no lakon sira nia riku-soin.

“Ami iha ona dadus provizóriu hosi Munisípiu Aileu iha uma hamutuk 24, Baukau (34), Bobonaru (43), Ermera (450),  Likisá (69), Manufahi (14), Vikeke (6), Lautein (2) ho Rejiaun Administrativu Oekusi-Ambenu hamutuk uma 21”, informa Sekretáriu Estadu Protesaun Sivíl, Alexandrino Xavier de Araújo, ba Ajénsia  TATOLI foin lalais ne’e.

Nia dehan, hosi anin boot no ahi han uma rezulta mós vítima na’in-ida mate iha Aileu no na’in-rua kanek hosi Munisípiu Ermera. Iha fali Vikeke mós ahi han kapela rua no Ainaru-Hatubuiliku ahi han eskola rua.

Família afetadu hamutuk 285 mak simu ona apoiu emerjénsia no 379 mak seidauk simu. Nune’e mós iha Munisípiu balu ne’ebé estoke mamuk ka hotu no iha balu tanba transporte laiha atu lori apoiu emerjénsia ba vítima sira.

Jornalista : Antónia Gusmão

Editora : Maria Auxiliadora  

HAKEREK NO HATÁN

Please enter your comment!
Please enter your name here