BAUCAU, 28 outubru 2019 (TATOLI)-Autoridade sira iha konsellu suku ne’ebé pertense ba area jurizdisaun Munisípiu Baucau nian dezde tempu bei’ala sira nian to’o mai ohin loron kontinua uza lei tradisionál hodi halo mediasaun ba disputa entre komunidade sira iha suku laran.
Notísia Relevante : MRLAP Hala’o Konsultasaun Públika ba Lei Kostumeiru ho Justisa Tradisionál iha Baucau
Liuhosi konsulta públiku Lei Kostumeiru ho Justisa Tradisionál ne’ebé hala’o hosi ekipa jurídiku Ministériu Reforma Lejizlativa no Asuntu Parlamentár (MRLAP) ba autoridade sira Munisípiu Baucau nian, ohin, Xefe Suku Soba, Postu Administrativu Laga, Francisca Monica de Fatima Soares, Xefe Suku Abafala, Postu Administrativu Quelicai, Josefa Oliveira, ho Xefe Suku Bualale, Postu Administrativu Quelicai, Gabriela Belo da Conseição, informa katak, durante ne’e konsellu suku ne’ebé sira lidera halo mediasaun ba disputa sira entre komunidade uza hela lei tradisionál no dala barak komunidade sira simu malu hodi hakotu disputa sira ne’e iha suku laran de’it. Maibé, dala ruma mós kazu sira ne’ebé todan autoridade koopera ho polisia hodi lori ba rezolve tuir justisa formal.
“Dala barak ami husi suku uza mediasaun hodi rezolve problema komunidade ne’ebé mak enfrenta iha baze entaun ho konsulta públika ida ne’e importante tebes atu fortifika bazeia ba lei númeru 9/2016 hodi garantia ba ami nune’e uza meius mediasaun atu bele hetan susesu,” Xefe Suku Soba, Francisca Monica de Fátima Soares.
Xefe Suku Abafala, Josefa Oliveira, hatete, nia ladún kontente ho programa MRLAP kona-ba konsulta públika tanba Governu liuhosi MRLAP la konsidera lia na’in sira (Suku Abafala-red) atu partisipa iha programa refere.
“Ha’u sente triste tanba ha’u-nia lia Na’in husi Suku Abafala la partisipa ba programa ne’e. Tuir loloos sira mak mai para esplika kle’an liu kona-ba lei tradisionál. Ha’u asume knaar hanesan Xefe Suku ne’e servisu tutan de’it maibé hatene barak liu ne’e mak Lia Na’in sira,” Josefa haktuir.
Xefe Suku Bualale, Gabriela Belo da Conseição hatete, tuir loloos Xefe Suku, Xefe Aldeia no lia na’in sira tenke akompaña programa no serbisu saida mak MRLAP implementa iha munisípiu tanba programa ne’e importante.
“Ha’u husu ba MRLAP atu tinan seluk realiza programa konsulta públika ida ne’e presiza sosializa antes semana ida atu ami bele aviza ba autoridade komunitária iha suku nian,” hateten Gabriela Belo da Conseição.
Jornalista : Osória Marques
Editór : Francisco Simões
