Sekretáriu Estadu Juventude no Desportu, Nélio Isaac Sarmento. Imajen/Tatoli

DILI, 28 outubru 2019 (TATOLI) – Sekretáriu Estadu Juventude no Desportu, Nélio Isaac Sarmento, hateten Estádiu Manatuto kontinua paradu tanba parte Kompañia Obrai rasik liuhosi ninia administradór foun, seidauk hakbesik-aan ba Sekretaria Estadu Juventude no Desportu (SEJD), nune’e bele hanaruk tan kontratu bazeia ba desizaun hosi Konsellu Administrasaun Fundu Infraestrutura (KAFI) ne’ebé hasai ona.

Governante ne’e dehan, bainhira kompañia hakat ba SEJD maka parte rua foin bele halo kontratu estensaun ida, hodi hahú halo hikas servisu.

“Loloos ne’e estádiu ne’e ramata ona, maibé iha tinan 2018 kompañia ne’ebé halo obra ne’e iha problema internál hodi halo mudansa ba estrutura no administradór kompañia ninian maibé kompañia nia naran nafatin”, tenik Nélio ba Agência Tatoli iha resintu Parlamentu Nasionál (PN), segunda ne’e.

Tuir governante ne’e, responsável kompañia tenke foti desizaun hodi troka hotu diretór foun ne’e atu bele hahú halo ona obra, tanba ne’e Governu hein hela bainhira dirijente foun mai maka sei akordu foun hodi bele hala’o ona sira ninia servisu hodi kompleta obra.

Iha parte seluk, Governu mós kontinua hein nafatin kompañia refere bainhira maka bele iha kapasidade finanseiru naton hodi aprezenta.

“Kompañia ne’e sei kaer nafatin obra, maibé tanba mudansa ba sira ninia estrutura maka KAFI endosa ona katak fó apoiu atu kontinua mantein kaer nafatin. Maibé SEJD hanesan nain ba projetu, nafatin prepara asinatura estensaun hamutuk ho Komisaun Nasionál Aprovizionamentu (CNA-sigla portugués) hodi prepara sira nia kontratu foun,” nia akresenta.

SEJD rasik halo ona kontaktu ba kompañia Obrai ne’ebé kaer obra Estádiu Manatuto, maibé diretór kompañia sei iha estranjeiru.

“Maski nia iha hela rai liur (Singapura), maibé ami rona informasaun katak loron rua ka tolu hanesan ne’e nia to’o ona mai Timor-Leste. Entaun ami hein nafatin atu nia mai aprezenta-aan iha SEJD ho verifikasaun ne’ebé sira halo iha terrenu hamutuk ho ami ninia tékniku sira atu nune’e maka ami foin bele estende kontratu ba sira”, nia dehan tan.

Entretantu, konstrusaun ba Estádiu Manatuto hahú iha tinan 2015, ho orsamentu hamutuk ba obra ne’e maka millaun $2, maibé Governu konsege selu ona pursentu 60 ba kompañia, maibé to’o ohin loron seidauk finaliza.

Estádiu ne’e tuir planu sei fó naran “Kay Rala Xanana Gusmão”.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here