DILI, 25 outubru 2019 (TATOLI) – Governu liuhosi Sekretaria Estadu Komunikasaun Sosiál (SEKOMS) fó ona apoiu osan hamutuk $20.000 ba suku Rotutu, postu administrativu Same, munisípiu Manufahi no suku Liurai, postu administrativu Aileu, munísipiu Aileu, hodi harii sentru informasaun ba komunidade iha suku rua ne’e.

Sekretáriu Estadu Komunikasaun Sosiál, Merício Juvinal dos Reis ‘Akara’, esplika osan ne’ebé aloka ba suku rua hanesan orsamentu hosi fundu transferénsia públika, ne’ebé kada suku hetan $10.000.

“Osan ne’ebé aloka ba suku sira ho totál diferente, depende ba proposta ne’ebé haruka mai. Suku sira ne’ebé ita fó apoiu osan atu ajuda sira instala sentru informasaun”, tenik Akara iha Palásiu Governu, sesta ne’e.

Tanba ne’e, Xefe suku Rotutu no Liurai hamutuk ho Koordenadora Organizasaun Defisiente Tilun Timor-Leste (ODTTL), hala’o soru-mutuk ho Sekretáriu Estadu Merício hodi selebra kontratu ida ba atividade ne’ebé sei hala’o iha suku rua ne’e.

“Programa ne’ebé SEKOMS halo hanesan kontinuasaun hosi programa Naroman ba Suku no mós interpretasaun ida hosi polítika Governu nian katak, Governu iha povu nia leet para bele fasilita nafatin informasaun ba ita-nia komunidade sira iha área rurál”, nia haklaken.

Governante ne’e haktuir, ODTTL mós hatama ona proposta ida ba SEKOMS hodi husu apoiu finanseiru nune’e bele fasilita formasaun ba ema ho difisiente liuliu tilun.

“Entaun, ha’u dehan ona ba sira oinsá bele fó formasaun di’ak liután ba lian jestu, tanba hosi ida-ne’e mak sira bele akompaña informasaun. Ho nune’e maka SEKOMS liuhosi orsamentu transferénsia públiku ida-ne’e bele apoiu mós sira. Maibé, kona-ba totál osan parte SEKOMS sei analiza”, nia subliña.

Iha parte seluk, SEKOMS mós fó ona apoiu ba Asosiasaun Jornalista Timor-Leste (AJTL) no Timor-Leste Press Union (TLPU) hodi bele hala’o atividade formasaun.

“Semana kotuk ita mós asina akordu hodi apoia asosiasaun jornalista sira, nune’e sira bele hala’o mós atividade formasaun”, nia informa.

Akara dehan tan, totál osan hosi fundu transferénsia públika ne’ebé SEKOMS prevee iha tinan 2019 maka $200.000, nune’e bele apoiu grupu sira hodi hala’o atividade.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here