Juis Administradór foun na’in tolu ne’ebé simu pose hosi Prezidente Tribunál Rekursu (PTR), Deolindo dos Santos, kompostu hosi Juis Administradór Tribunal Distritál Dili (TDD), Afonso Carmona, Juis Administradór Suai, José Maria de Araújo ho Juis Administradór Baucau, José Gonçalves, kinta (24/10/2019). Imajen/Domingos Piedade

DILI, 24 outubru 2019 (TATOLI) –Prezidente Tribunal Rekursu (PTR), Deolindo dos Santo, husu ba juiz administradór foun ne’ebé, ohin, simu pose atu halo jestaun di’ak hodi aselera kazu pendente sira.

Notísia Relevante : PTR Fó Pose ba Juiz Administradór Tolu

Juiz Administradór na’in tolu ne’ebé simu pose nee, kompostu hosi Juiz Administradór Tribunal Distritál Dili (TDD), Afonso Carmona, Juiz Administradór Suai, José Maria de Araújo ho Juiz Administradór Baucau, José Gonçalves.

“Ha’u hanoin juiz administradór nain tolu hanesan forsa ida atu halo jestaun ne’ebé mak di’ak liu no enkoraja juiz sira atu tur hamutuk iha tribunal distritál sira hotu atu bele serbisu hamutuk ho konsellu majistratura sira, nune’e bele dudu prosesu sivíl no krime ne’ebé mak kontinua pendente iha tribunal distritál sira,” afirma PTR, Deolindo dos Santos, iha Tribunal Rekursu, Caicoli, Dili.

Maske oras nee daudaun hasoru hela dezafiu oi-oin, maibé PTR Deolindo dos Santos, husu atu enposadu sira kontinua komunga kometimentu iatu serbí povu no Estadu hodi garante lala’ok justisa ba ema hotu hanesan.

Nia hatutan, uluk justisa Timor-Leste hala’o serbisu hamutuk ho maluk juizés ne’ebé mak ko’alia lian portugés no inglés ho forma ne’ebé mak di’ak maibé agora lao mesak ona no jere rasik.

Agradese ba Konfiansa

Juiz Administradór Tribunal Distritál Dili (TDD), Afonso Carmona, lori nia kolega juiz administradór sira nia naran hato’o agradese ba PTR ba konfiansa ne’ebé iha ba sira atu lidera tribunal distritál Baucau, Dili ho Suai.

 “Konfiansa ne’ebé mak PTR fó ona ba ami nain tolu mak ami sei hala’o ho podér no responsabilidade iha ita nia sistema justisa nian,” hateten Afonso Carmona.

Nia hatutan, estrutura Tribunal iha Timor-Leste, iha rua de’it mak Tribunal Rekursu hanesan segundu instánsia no Tribunal Distritál sira hanesan primeira instánsia hodi garante sidadaun sira nia direitu ba asesu justisa.

Juiz administradór na’in tolu komprometidu u atu asegura serbisu Tribunal Distritál tuir lei no tenke ezerse funsaun atu administra justisa  no asegura juiz sira nia serbisu ho rekursu ne’ebé iha.

Razaun  PTR hili sira nain tolu bazeia ba avaliasaun dezempeñu hosi aspetu hot-hotu, inklui esperiénsia ho movimentu serbisu judisiál nian.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here