DILI, 25 outubru 2019 (TATOLI)-Primeiru-Ministru, Taur Matan Ruak, nomeia Filipe da Costa, atuál Koordenadór Gabinete Apoiu Sosiedade Sivíl, nu’udar reprezentante espesiál Gabinete Primeiru-Ministru nian ba Programa Seguransa Ai-han no Nutrisaun.
Nomeiasaun ne’e liuhosi despaxu no.047/C-GPM/IX/19, loron 4 fulan outubru 2019, hodi fó kompeténsia legal ba Filipe da Costa hala’o knar pontu vokál Gabinete Primeiru-Ministru nian atu hamutuk ho Ajénsia Internasionál sira ho Ajénsia Autónoma atu dezenvolve atividade iha área seguransa ai-han no nutrisaun.
Knar ne’e mós sei fasilita diálogu no konduta enkontru tékniku estratéjiku kona-ba polítika no programa seguransa ai-han no nutrisaun hodi serbisu hamutuk ho UPMA (Unidade Planeamentu Monitorizasaun no Avaliasaun) hodi halo planeamentu, monitorizasaun no evaluasaun ba setór relevante seguransa-ai-han no nutrisaun.
Iha kinta (24/10/2019), Filipe da Costa konvoka reuniaun ida ho Koordenadór Rezidente ONU iha Timor-Leste, Roy Trivedy, inklui reprezentante sira hosi FAO, UNICEF, WFP, DFAT, PHD no Sekretáriu KONSSANTIL hosi Ministériu Agrikultura no Peska, introdús nia-an no oinsá atu serbisu hamutuk ho parte sira ne’e hodi armoniza dokumentu haat ne’ebé Ajénsia ONU no doadór sira propoin ba Governu kona-ba atinje Objetivu Dezenvolvimentu Sustentável II (ODS), liga ba seguransa ai-han no nutrisaun.
Dokumentu haat ne’ebé presiza armoniza mak hanesan, Planu Asaun Halakon Hamlaha no Nutrisaun Zero, Estratéjia Nasionál ba Nutrisaun, Polítika Nasionál Seguransa Ai-han no Nutrisaun (Rezolusaun Governu 2016) no Prioridade ba atinje Objetivu Dezenvolvimentu Sustentável (Rezolusaun Parlamentu Nasionál 2017).
Objetivu armoniza dokumentu haat ne’e atu kria framework no indikadór sira kona-ba importánsia ba investe iha seguransa ai-han no nutrisaun no, oinsá bele ajuda liña ministériu sira ne’ebé relevante atu bele implementa di’ak planu asaun.
Koordenadór Rezidente ONU iha Timor-Leste, Roy Trivedy sente kontente tanba Primeiru-Ministru tau importánsia ba programa seguransa ai-han no nutrisaun. Sira mós sujere atu involve mós sosiedade sivíl iha área ne’e hodi bele fó advokasia ba Governu.
Jornalista : Eugénio Pereira
Editór : Francisco Simões
