Lansamentu deslokasaun estudante DKS ba Munisípiu. Foto TATOLI: Nelia Fernandes

DILI, 25 outubru 2019 (TATOLI)-Dirasaun Nasionál Sentru Rádiu Komunidade (DN-CRC), Sekretáriu Estadu Komunikasaun Sosiál (SEKOMS), ho apoiu husi UNICEF (United Nation International Children Fund) realiza lansamentu deslokasaun estudante na´in neen husi Departamentu Komunikasaun Sosiál (DCS), Fakuldade Siénsia Sosiál (FCS), Universidade Nasionál Timor Lorosa´e (UNTL) hodi promove rejistu moris ba labarik sira, iha Sentru Rádiu Komunitáriu (SRK) neen.

SRK neen ne´e mak Rádiu komunidade Ermera, Covalima, Manufahi, Manatutu, Baucau no Viqueque, hamutuk ho jestór sira durante loron 22.

Xefe Departamentu CS, Marcelino Ximenes Magno, iha marjen lansamentu ne´e, ba mídia sira katak kooperasaun ho UNICEF ne´e ba dala rua ona.

Departamentu Komunikasaun Sosiál, programa ida ne’e importante tebes, la’ós de’it ba atividade rejistu moris nian maibé ita haree husi aspetu ida luan liu. Katak, Governu, Organizasaun Nasaun Unida, ajénsia sira mós fiar FCS, liuhusi Departamentu CS ne´e.

Tanba ne’e sira fiar estudante sira, sira husu ajuda mós ba ita-nia estudante sira atu envolve iha programa ida ne’e.

“Departamentu sente haksolok tebes tanba liuhusi programa hanesan ne’e ita-nia estudante sira bele aprende.  Antes sira ba, sira treinu uluk tiha, oinsá halo peskiza, oinsá halo programa, sira hetan treinamentu uluk no ida ne’e lori valor bo’ot mós ba departamentu no fakuldade,” dehan Xefe Departamentu, Marcelino Ximenes Magno, iha Kampus FCS, Caicoli-Dili, sesta ne´e.

Akadémiku ne´e konsidera katak tuir UNICEF rejistu moris ba labarik importante tebes. “Se ita la iha rejistu katak ita la´ós ema nasaun ninian ida. Tanba ne’e mak ohin atividade ida ne’ebé importante la halimar até estudante na’in ne’en atu ba apoiu governu no UNICEF lori halo programa ida, importante liu ba nasaun liuliu ba rejistu labarik nian”.

Interveniente envolvidu iha apoiu estájiu ba estudante Komunikasaun Sosiál-UNTL mak UNICEF ho serbisu hamutuk ho SEKOMS no Ministériu Justisa. Verba alokada ba atividade ida ne´e mai husi governu Japaun. “Kona-ba orsamentu, ami lahatene ne’e, sira husi UNICEF fó ba iha SEKOMS,” haktuir profesór Marcelino Magno.

Iha parte seluk, reprezenta estajiadu ba estudante na’in ne’en, Isac Henrique R. da Silva hateten, hanesan estajiadu ida ne’e hanesan responsabilidade ida oinsá para ajuda jestor rádiu komunidade sira atu oinsá bele promove di’ak liután rejistu moris ba labarik nian.

“Tanba ida ne’e ha’u konsidera hanesan responsabilidade akadémika ba siénsia hirak ne’ebé ami aprende. Maibé, ida ne’e mós hanesan responsabilidade sosiál ida ami nian oinsá bele implemeta siénsia hirak ne’ebé ami aprende no koñesimentu hirak ne’ebé ami hetan iha Departamentu Komunikasaun Sosiál,” hateten estajiadu Isac Henrique R. da Silva.

Disente Komunikasaun Sosiál, FCS, UNTL ne´e rekoñese katak estájiu hodi promove rejistu moris ba labarik sira, liuhusi SRK ne´e hanesan onra boot ida ba sira tanba bele serbisu hamutuk ho komunidade, aprende hamutuk ho komunidade oinsá atu bele hadi´a liután sira-nia kapasidade no nia konsidera ida ne´e nu´udar mós oportunidade ida.

“Depois ami tun ba baze, se bele serbisu di’ak liután, ami bele ho ami-nia kapasidade hirak ne’ebé ami hetan iha nível departamentu nian iha universidade, ami bele esforsu aan maka´as para oinsá bele kontribui ho forsa ne’ebé ami iha ba iha komunidade liuliu kona-ba rejistu moris nian,” konsidera estudante estajiadu ne’e.

Partisipa iha programa lansamentu ne´e  mak estudante no dosente sira iha Departamentu Komunikasaun Sosiál no seluk tan iha FCS, UNTL.

Notísia relevante:Japaun-UNICEF Asina Nota Sistema Rejistu Iha TL

Jornalista : Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here