Ministra Edukasaun, Juventude no Desportu (MEJD), Dulce de Jesus Soares Inagurasaun Eskola Ensinu Pre-Eskolar 12 Outubro Tasi Tolu. Imajen/Tatoli

DILI, 25 outubru 2019 (TATOLI) – Edifísiu Eskola Ensinu Pré-Eskolár (EPE), Dona Dulce de Jesus Soares, Tasi Tolu,  hetan ona inaugurasaun husi Ministra Edukasaun, Juventude e Desportu (MEJD), Dulce de Jesus Soares. Konstrusaun eskola ne’e rasik konsege gastu orsamentu estadu liu rihun 100.

Eskola ne’e rasik ninia konstrusaun remata ka konklui tiha ona 2018 maibé foin mak iha posiblidade hodi halo serimónia inaugurasaun.

MEJD, Dulce de Jesus Soares hateten katak orsamentu liu rihun $100 ne’ebé estadu apoiu ba eskola Ensinu Báziku filiál 12 outubru ne’e konsege halo eskola ida ho sala neen.

Ministra Edukasaun, Juventude no Desportu,
Dulce de Jesus Soares. Imajen/TATOLI

“Sala haat utiliza ba ensinu báziku no sala rua utiliza ba ensinu pré-eskolár,” hateten Ministra Dulce de Jesus ba jornalista sira iha eskola ensinu Báziku filiál 12 outubru Tasi tolu, sesta (25/10/2019).

Governante ne´e konfirma, agora daudaun estudante ensinu báziku primeiru no segundu siklu iha 12 outubru ne’e liu rihun ida no ensinu pre-eskolár liu 100.

“Tanba ne’e mak ohin iha serimónia kombinasaun ida hodi halo graduasaun ba estudante ensinu pre-eskolár 51 ne’e hodi kontinua fali sira-nia estudu iha ensinu báziku primeiru siklu no primeiru ano iha eskola filiál ida ne’e.

Gradua Estudante 51

Ministra Edukasaun, Juventude no Desportu (MEJD), Dulce de Jesus Soares Graduasaun Eskola Ensinu Pre-Eskolar 12 Outubro Tasi Tolu. Imajen/Tatoli

Ensinu Pré-Eskolár Dona Dulce de Jesus Soares gradua primeiru estudante finalista na´in 51. Estudante graduadu sira ne´e kompostu husi feto 28 no mane 23. Graduasaun ne´e asiste direta husi Ministériu Edukasaun, Juventude no Desportu (MEJD), Dulce de Jesus Soares.

Eskola Pré-Eskolar ne’e foin mak eziste iha aredór Eskola Ensinu Báziku Filiál 12 outubru, Tasi tolu.

Ministra Edukasaun, Juventude no Desportu (MEJD), Dulce de Jesus Soares Hamutuk ho Estudante Eskola Ensinu Pre-Eskolar 12 Outubro Tasi Tolu. Imajen/Tatoli

Profesór sira ne´ebé mak dezenvolve atividade letiva iha estabelesimentu ensinu pré-eskolár ne´e hamutuk na´in lima, feto haat no mane ida. Enkuantu, sala aula nian, pré-eskolár ne´e iha sala aula tolu no agora daudaun iha estudante grupu rua mak utiliza eskola ne’e.

Grupu dahuluk hetan ona graduasaun no grupu segundo sei kontinua fali sira-nia prosesu aprendizajen.

Entretantu, naran EPE Dona Dulce de Jesus Soares ne´e nu´udar desizaun Konsellu Profesór (KdP) sira iha Eskola 12 Outubru

Jornalista : Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here