Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 24 outubru 2019 (TATOLI) – Prezidente Parlamentu Nasionál (PPN), Arão Noé de Jesus  da Costa Amaral, konsidera audiénsia komisaun ho entidade relevante ba Orsamentu Jerál Estadu (OJE) 2020 importante tebes tanba bainhira hatama númeru ezekusaun ba sistema bele iha manobra, tanba ne’e tenke iha apresiasaun komisaun hodi bele deteta.

“Ida-ne’e mak iha audiénsia ho komisaun sira hodi bele kruza informasaun sira, nune’e bele deteta ezekusaun real to’o agora atinje hira”, tenik PPN iha resintu Parlamentu Nasionál (PN), kinta ne’e.

Nia fó ezemplu, karik deteta kondisaun eskola no postu saúde ladún di’ak, no mós karik funsionamentu postu polísia ladún la’o.

“Ita bele konfirma ho Ministru sira kona-ba ezekusaun orsamentu 2019, hafoin prioridade 2020 nian. Tanba ne’e maka ami fó tempu barak atu halo audiénsia, kuaze fulan ida hodi komisaun sira bele husu justifikasaun klaru ba entidade sira”, nia akresenta.

Nune’e mós, nia subliña, bainhira ministériu ida iha orsamentu ne’ebé boot, ministériu ne’e tenke justifika ezekusaun orsamentu 2019 nian hodi bele projeta ba 2020.

“Ha’u hanoin ida-ne’e maka presiza kruza entre deputadu sira ho membru governu relevante kada ministériu ida-idak, atu nune’e bele hetan klarifikasaun di’ak ba ezekusaun orsamentu 2019 hafoin haree ba planu 2020 atu bele responde saida maka deputadu sira deteta durante fiskalizasaun iha terrenu”, Deputadu Bankada CNRT ne’e dehan.

Nia salienta, durante ne’e PN liuhosi Komisaun Espesializada sira halo hela fiskalizasaun ba ezekusaun orsamentu 2019 nian kuaze tinan ida ona, maibé buat hotu depende ba deputadu sira-nia fiskalizasaun.

Arão Noé observa, durante ne’e ema preukupa liu kona-ba númeru ezekusaun duké liga ba real, maibé tenke haree mós fíziku iha terrenu la’o oinsá.

Nia dehan tan, bainhira persentajen ezekusaun bele boot maibé realidade la hatudu liuhosi fízika (saida maka halo ona) ne’e ladún di’ak, entaun tenke kruza ezekusaun ho real.

Tuir Portal Transparénsia, ezekusaun governu atuál maka, orijen $1,478,983,976.00, kompromisu $110,268,998.74, obrigasaun $130,606,972.47, atuál $813,769,139.00 no saldo $424,338,865.79.

Husi dadus hirak ne’e, ezekusaun to’o loron kinta (24/10) atinje ona pursentu 63.8.

Jornalista : Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here