Segundu Komandante PNTL Munisípiu Manatuto, Superintendente Asistente Joni Viana. Imajen/TNelson Sousa

MANATUTO, 24 outubru 2019 (TATOLI)—Polisia Nasionál Timor-Leste (PNTL) Munisípiu Manatuto, husu ba motorista sira atu “matan moris no neon na’in” lori transporte ba pasa ferias iha munisípiu iha loron matebian (finadu).

Tinan-tinan, asidente tráfiku sa’e maka’as iha loron ferias matebian nian, tanba dezlokasaun boot hosi Dili ba munisípiu sira ho transporte. Tanba ne’e, importante tebes atu ema hotu la’o ho kuidadu atu bele to’o fatin distinsaun ho di’ak.

“Apela ba motorista hotu  ne’ebé kondús karreta ka motor atu la’o ho kuidadu  no velosidade neineik no kontrola kondisaun transporte molok halo viajen,” alerta Segundu Komandante PNTL  Munisípiu Manatuto,   Superintendente Asistente Polisia Joni Viana, ohin, ba Ajénsia TATOLI iha salaun Administrasaun Munisípiu Manatuto.

Komandante Polisia ne’e mós garante sei asegura situasaun pás no hakmatek ba komunidade atu tau ai-funan iha loron boot matebian nian ne’ebé sempre selebra iha loron 02 novembru.

Nia haktuir tan, durante loron ferias Polisia kontinua asume nia responsabilidade atu mantein lei ho orden no halo pasa revista ba  transporte públika, motor ho karreta, liuliu verifika  karta kondusaun, karta inspesaun no dokumentu transporte nian.

 “Auto estop ba transporte sira ne’e ami sempre halo, maibé ami la determina bainhira mak bele halo. Ami bele halo derrepente de’it no bainhira de’it,” afirma Superintendente Asistente Joni Viana.

Daudaun ne’e situasaun seguransa ein-jerál iha Munisípiu Manatuto la’o kontroladu no hakmatek.

Jornalista : Nelson de Sousa

 Editór       : Francisco Simões

HAKEREK NO HATÁN

Please enter your comment!
Please enter your name here