Diretór ESG Nicolau Lobato, Marcos Soares Pacheco. Foto TATOLI: Nelia Fernandes

DILI, 24 outubru 2019 (TATOLI)-Ensinu Sekundária Jerál (ESG), Nicolau Lobato, koopera ho Organizasaun Naun-Governamentál (ONG) Ba Futuru promove formasaun ba profesór inklui estudante sira kona-ba oinsá jere partisipasaun estudante sira nian iha atividade létiva sira katak profesór sira atu hanorin la´ós de´it esplika iha kuadru hanorin no ko´alia to´o aula finaliza maibé oferese mós tempu barak ba estudante sira atu ko´alia.

“Husi formasaun ne’e atu kapasita profesór sira, labele ko’alia to’o hotu iha sala laran maibé profesór tenke buka no fó tempu ba estudante sira bele loke nia hanoin kona-ba siénsia ne’ebé nia estuda ba. Durante tinan tolu profesór sira tuir trainamentu iha ONG ba Futuru. Treinadór sira husi Austrália no Amérika,” hateten Diretór ESG Nicolau Lobato, Marcos Soares Pacheco, ba Ajénsia TATOLI iha nia knaar fatin, foin lalais ne´e.

Manorin ne´e haktuir katak iha périodu formasaun ne´e sira hetan mós katak profesór sira labele halo agresaun fízika ba alunu sira no mós fó parabéns ba estudante sira, bainhira profesór ida halo pergunta ba estudante ida no konsege resposta maske sala.

Iha biban hanesan, nia informa, treinamentu ne’e hotu iha tinan rua ba kotuk tanba, ESG Nicolau Lobato serbisu hamutuk ho ONG Ba Futuru ne’e tinan tolu; komesa iha 2015 hotu iha 2018.

Eskola ne’e serbisu hamutuk ho ONG Ba Futuru, fó mós formasaun ba estudante feto sira oinsá atu kapasita labarik feto sira foka liubá iha lideransa no mós abilidade moris nian (life skills) ba estudante sira. “Oinsá sira bele respeita malu”.

Diretór relata katak, estudante sira ne’ebé tuir formasaun ne’e, sira eskolla iha kada sala ida foti ema na´in 20. Totál estudante ne’ebé tuir formasaun hamutuk 120 pessoas“.

“Maibé, husi formasaun ne’e sira fokus liu mak primeiru ano no segundu ano, hodi nune’e kuandu formasaun ramata, sira bele fahe tutan fali ba alin sira tuir mai,” tenik manorin na’in ne’e.

Alende, Eskola Sekundariu Jeral (ESG) Nicolau Lobato hala’o kooperasaun ho ONG Ba Futuru fó formasaun ba profesór no estudante sira, iha eskola ne’e mós promove atividade extra-kurríkulár hanesan atividade desportiva ba estudante sira.

 Jornalista :Nelia Fernandes

Editór       :Rafy Belo 

HAKEREK NO HATÁN

Please enter your comment!
Please enter your name here