Xefi Sentru Saude Postu Administrativu Laclubar Manuel Soares Quintão. Imajen/Nelson Sousa

LACLUBAR, 24 outubru 2019 (TATOLO)-Iha inísiu janeiru to’o  setembru, tinan ne’e, sentru saúde moras mental Laclubar rejista  no fó tratamentu ba ema moras mental na’in 48 hosi territóriu Timor-Leste.

Maioria moras mental hirak ne’e ho idade entre tinan 20 to’o tinan  40 no pasiente 48 ne’e kompostu hosi mane na’in 31 ho feto na’in 17.

Xefe Sentru Saúde Postu Administrativu Laclubar, Munisípiu Manatuto, Manuel Soares Quintão, informa ba Ajénsia TATOLI iha Laclubar, ohin, katak, pasiente moras mental 48 ne’ebé hala’o tratamentu  Sentru Saúde Moras Mental Laklubar, na’in 37 mak fila ona ba ida-idak nia munisípiu tanba rekupera ona no hela na’in 11 mak kontinua halo tratamentu.

Xefe Sentru Saúde Laclubar ne’e mós informa, daudaun ne’e sentru saúde moras mental  enfrenta hela difikuldade falta kama ba pasiente sei menus tanba durante ne’e kama ba pasiente iha de’it 12.

“Husu ba Ministériu Saúde atu bele mós fó apoiu sentru ne’e hodi  fó atendimentu di’ak liu tan ba pasiente sira,” hateten Manuel Soares Quintão.

Sentru ba moras mental durante ne’e hetan apoiu fundu hosi Ministériu Solidariedade Sosiál  no Inkluzaun (MSSI)  ho  mós Ministériu  Saúde ne’ebé koloka médiku jerál ida ho enfermeiru nain rua.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here