Ahi han uma lisan 13 iha Suku Abu, Postu Administrativu Quelicai, Munisípiu Baucau, kuarta dadeer (23/10/2019). Imajen foti hosi kronolojia Facebook Abãs d'Såntòs

DILI, 23 outubru 2019 (TATOLI)-Uma lisan 13 ne’ebé hamriik hafutar iha Foho Matebian nia hun iha Suku Abu, Postu Administrativu Quelicai, Munisípiu Baucau, ohin dadeer, ahi han mutuk didi’ak no la konsege salva sasan lulik lubuk ida ne’ebé tau iha uma lisan hirak ne’e nia laran.

Notísia Relevante : Inséndiu ho Anin Boot Estraga Uma 572 iha Munisípiu Haat

Dadus provizória ne’ebé rekolla hosi Komandu Polisia Nasionál Timor-Leste Eskuadra Quelicai ho autoridade Suku Abu, ahi han uma lisan hirak ne’e, seidauk hatene loloos no serteza vítima na’in hira hosi inséndiu ne’e.

“Tuir relatóriu ne’ebé ohin ami rekolla ho Xefe Suku Abu no vítima sira haktuir katak,  uma lisan de’it kuaze 13 maka ahi han motuk iha parte foho Matebian nian no uma populasaun nian seidauk rekolla, tanba uma balun ahi sei kontinua han,” informa Komandante Eskuadra Polisia Postu Quelicai, Inspetór Polisia, Felis dos Santos, ba Ajénsia TATOLI via telefone.

Ho akontesimentu ne’e, autoridade suku inklui polisia sira too kedas iha fatin akontesimentu hodi ajuda no evakua  vítima sira inklui buka hasai  sasán balun.

Nia hatutan, populasaun sira nia uma lisan inklui sasán rikusoin barak maka ahi han mutuk, tanba iha foho Matebian nian hun akompaña ho inan makas hodi halo vítima sira la konsege salva sasán.

Inséndiu ne’e mezmu la rezulta ema ruma mate no kanek, maibé populasaun balun tanis tanba haree direita ahi han mutuk sira nia uma lisan no sasán sira.

Oras ne’e daudaun komunidade sira sei konsentra hamutuk iha parte foho Matebian nian hodi antesipa inséndiu labele kontinua akontese.

Parte seluk, PNTL inklui autoridade suku rasik sei halo investigasaun hodi buka hatene informasaun klaru kona-ba motivu inséndiu ne’ebé akontese.

Relasiona ho akontesimentu ne’e, Sekretáriu  Estadu Protesaun Sivil (SEPS), Alexandrino Xavier Araújo, haruka ona ekipa hosi Munisípiu Baucau inklui ekipa Bombeiru koloka ona ba fatin akontesimentu hodi rekolla dadus no fó apoiu emerjénsia ba vítima sira.

Hosi sorin seluk,  inséndiu hanesan akontese mós iha Porte área Urahou- parte Foto Ramelau nian ne’ebé rezulta  ahi han uma 50 resin no iha tersa (22/10/2019), ahi han mós uma komunidade nian balun iha Railaco-Ermera nian.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here