Ekipa AIFAESA haree hela sasán iha kioske sira bainhira halo inspesaun ba produtu liu prazu no sigarru ilísitu iha Bidau-Toko Baru, Tersa (22/10/2019). Imajen TATOLI/Antónia Gusmão.

DILI, 22 outubru 2019 (TATOLI) – Autoridade Inspesaun no Fiskalizasaun ba Atividade Ekonómika, Sanitária no Alimentár (AIFAESA), ohin, akompaña hosi Polísia Nasionál Timor-Leste (PNTL) halo inspesaun ba operadór ekonómiku sira ne’ebé hala’o atividade komersiál ne’ebé husi  realizasaun ne’e apreende (foti) sasán liu prazu no sigarru ilísitu.

Atividade inspesaun ne’e hanaran inspesaun konsentrada hosi Estadu membru Forum Inspesaun Seguransa Alimentár (FISAAE), iha ne’ebé AIFAESA Timor-Leste maka asume kargu prezidénsia. Tanba ne’e, hosi Estadu membru sira ida-idak halo inspesaun ba sasán liu prazu no sigarru ilísitu.

Diretór Operasaun AIFAESA, Gabriel da Costa, informa hafoin Estadu membru sira hala’o hotu inspesaun relata filafali katak difikuldade saida maka enfrenta nune’e tau hamutuk rezultadu hodi halo relatóriu hodi haree ba obstákulu sira ne’e.

“Inspesaun ne’e bolu naran inspesaun konsentrada ne’e inklui mós membru FISAAE, no FISAAE ne’e AIFAESA rasik maka asume prezidénsia, ho nune’e AIFAESA rasik halo inspesaun durante loron rua. Iha inspesaun ne’e haree liu ba tabaku ilísitu sira ne’ebé maka kontinua fa’an hosi operadór ekonómiku sira”, hateten Gabriel da Costa ba jornalista sira hafoin hala’o inspesaun iha Bidau, área Ospitál Nasionál Guido Valadares, ohin.

Ekipa AIFAESA haree hela sasán iha kioske sira bainhira halo inspesaun ba produtu liu prazu no sigarru ilísitu iha Bidau-Toko Baru, Tersa (22/10/2019). Imajen TATOLI/Antónia Gusmão.

Gabriel hatutan iha inspesaun ne’e haree duni katak operadór ekonómika sira ne’ebé fa’an iha área Bidau-Toko Baru ne’e identifika fa’an tabaku ilísitu. Iha dekretu lei hateten ona katak tabaku ilísitu sira ne’e labele fa’an rahun tenke masu para evita labarik ki’ik sira sosa, tanba fa’an rahun fasilmente labarik ki’ik sira sosa ho valór osan natoon.

Gabriel afirma, realidade iha inspesaun identifika operadór ekonómika sira kontinua fa’an rahun ne’e katak komete infrasaun ne’ebé sei prosesu tuir lei ne’ebé vigora. “Durante inspesaun ami mós fó hatene ba sira kona-ba lala’ok sira ne’e. Ne’ebé sira promete ba ami ona katak bá oin sei la fa’an sigarru rahun”, katak.

Aléinde identifika sigarru ilegál, ekipa AIFAESA mós identifika sasán liu prazu. “Antes ami atu haree sira-nia sasán ami aprezenta aan uluk no hato’o ami-nia respeitu ba sira, no sira mós simu ami-nia prezensa ho kontente no sira dehan durante ne’e sira seidauk hetan informasaun sira ne’e, entaun sira orgullu tebes ho prezensa AIFAESA nian hodi bele hala’o sira-nia negósiu”, haktuir Gabriel.

Sasán ne’ebé foti sei halo prosesu auto notísia hasoru estabelesimentu na’in sira, no prosesu refere sei submete ba parte jurídiku hodi notifika fali sira hodi defeza aan tuir lei sira.

“Ami haree mós katak sira-nia lisensa negósiu rasik balu foin halo, balu rai iha uma, no balu mate ona. Ne’ebé kuandu mate ona sei prosesa, no aplika multa mínimu rihun ida no másima rihun $ 10 mil”, katak.

Entretantu sasán ne’ebé AIFAESA foti tanba liu prazu hanesan masako, marmelada, dosi ho marka Gerry, no sigarru LA ho marka stiker.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here