Diretora Ezekutiva CI, Trudiann Dale, esplika meiu prezervasaun bioversidade iha Illa Ataúru. Imajen/Florencio Miranda Ximenes.

ATAÚRU, 22 Outubru 2019 (TATOLI) – Konservasaun Internasionál (CI, sigla inglés) koopera ho Ministériu Agrikultura no Peska (MAP) Timor- Leste no autoridade lokál no abitante sira konsege kria área marina protejida 12 ho ektare 1300 iha illa Ataúru.

Iha 2016, MAP hamutuk ho parseiru CI hala’o ona serbisu iha Ataúru hamutuk ho komunidade liuhosi atividade konservasaun, prezervasaun no uzu sustentavel ba rekursu naturál.

“Parte ida hosi servisu ne’ebé hala’o ona foka ba iha prezervasaun biodiversidade liuhosi asaun ba seguransa alimentár ne’ebé rezulta ona ho kria Área Marina Protejida (AMP) 12 bazeia ba komunidade ne’ebé lansa iha fulan kotuk liubá”, Diretora Ezekutiva CI, Trudiann Dale, iha salaun Juventude, suku villa Maumeta, Ataúru, ohin.

CI ho Words Fish hala’o mós estudu iha 2016 iha illa Ataúru liuliu iha tasi-laran hodi identifika balada tasi protejidu barak moris iha illa ne’e.

“Ami servisu ho komunidade rurál sira durante tinan tolu iha 2016 hamutuk ho Governu atu ajuda sira estabelese área protejida sira ne’ebé maka ami halo iha ne’e atu sira konserva no prezerva lenuk, ahu-ruin no balada seluk iha tasi-laran”, dehan.

Trudiann Dale friza atividade konservasaun no prezervasaun ne’e importante tanba proteje espésie sira hotu iha tasi-laran, hanesan ahu-ruin, lenuk no tubaraun no animál tasi.

CI mós hala’o ona atividade iha Munisípiu Likisá, Parke Nasionál Nino Konis Santa iha Munisípiu Lautein no Ataúru. “Ita-nia ekipa hala’o survey deteta animál espésie rua ne’ebé rezidente no korál ne’ebé sei eziste durante 6000 iha tasi illa Ataúru”, afirma.

Daudaun CI dezenvolve ona submisaun ba harii parke nasionál iha illa ne’e no sustentabilidade turizmu iha Timor Leste. “Iha Ataúru ne’e ahu-ruin moris di’ak tanba tasi la fo’er”, katak.

CI ho MAP mós hala’o ona mapeamentu ba rekursu iha tasi-laran, tanba ne’e CI propoin Ataúru sai Parke Nasionál Turizmu iha Timor-Leste.

Iha fatin hanesan, Administradór Postu Administrativu Ataúru, Munisípiu Dili, Mateus Belo, hatete CI nia atividade ne’e importante tebes iha Ataúru atu abitante sira bele proteje no prezerva biodiversidade tasi atu fó benefísiu ekonómiku no sustentável ba abitante sira.

“Konservasaun ne’e importante, ema labele halo atividade peska iha laran, hodi proteje ahu-ruin, biodiversidade ne’ebé iha, tanba ikan sira ne’e kuaze ami haree katak esplorasaun ne’e tempu ba tempu ne’e maka’as loos tanba komunidade ne’e maioria peskadór. Ita presiza konserva no proteje ona”, nia dehan.

Diretór Nasionál Akikultura, Horácio Santos Guterres, rekoñese atividade CI ne’e importante tebes tanba área servisu konserva no prezerva biodiversidade tasi-laran atu fó benefísiu ekonómiku sustentavel.

“Sira servisu hamutuk ho ami iha tinan barak tebes, atividade ne’e di’ak, oinsá atu konserva rikusoin ne’ebé maka ita iha”, katak.

Partisipa iha serimónia estabelese rede ba atividade konservasaun no prezervasaun no uzu sustentável rekursu naturál no proteje biodiversidade husi autoridade lokál no abitante sira postu administrativu illa ne’e..

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here