Marka Turizmu Timor-Leste. Foto/Egas Cristovão.

DILI, 21 outubru 2019 (TATOLI) – Ministériu Turizmu, Komérsiu no Indústria (MTKI) liuhusi Diresaun Nasionál Promosaun Turístiku no Relasaun Internasionál hala’o sensibilizasaun ba Marka Turizmu Timor-Leste.

Diretór Nasionál Promosaun Turístiku no Relasaun Internasionál, Edson Noronha, hatete sensibilizasaun ba Marka Turizmu ne’e importante tebes ho objetivu atu entidade tomak no mós ba populasaun iha Timór laran tomak koñese marka ne’e.

Diretór Nasionál Promosaun Turístiku no Relasaun Internasionál, Edson Noronha halo hela aprezentasaun kona-ba Marka Turizmu Timor-Leste, iha Sentru Konvensaun Dili,, Segunda (21/10/2019). Imajen TATOLI/Antónia Gusmão.

Edson Noronha hatutan sensibilizasaun ba marka turizmu ne’e hala’o ona iha munisípiu rua hanesan Bobonaru, Rejiaun Administrativu Espesial Oekusi-Ambenu (RAEOA) no ba dala tolu nian maka iha Dili.

“Programa ida ne’e hanesan planu anuál MTKI nian, no sei kontinua tan iha tinan oin. Ami hakarak realiza programa ne’e atu fó hanoin ba ita hotu katak ita iha ona marka turizmu rasik. Tanba dala barak ita hala’o atividade ruma ita seidauk koñese ita-nia marka, ne’ebé hosi sensibilizasaun ne’e fó koñesimentu ba ita rasik kona-ba ita-nia marka ne’e rasik ne’ebé Konsellu Ministru aprova ona”, dehan Edson bainhira loke atividade ne’e iha salaun Sentru Konvensaun Dili, ohin.

Eventu sensibilizasaun ne’e partisipa hosi estudante Universidade Orientál Timor Lorosa’e (UNITAL), Departamentu Turizmu.

Ministériu Turizmu, Arte no Kultura (MTAK) iha Sestu Governu, ofisialmente anúnsiu ona Marka Turizmu Timor-Leste ne’ebé ko’alia sobre Timor-Leste no Kór. Marka Turizmu ne’e iha kór tolu prinsipál ne’ebé reprezenta kona-ba bandeira Timor-Leste hanesan Uma-Lulik, Loron-Matan no letra Timor-Leste.

Kór tolu importante ne’e mak aprezenta iha Marka Turizmu Timor-Leste ne’ebé hatudu evidente katak Loron-Matan ho kór kinur, Uma-Lulik ho kór mean no lerta Timor-Leste ho kór metan ne’ebé refleta ba bandeira Repúblika Demokrátika Timor-Leste (RDTL).

Antes ne’e, Diretór Nasionál no Promosaun Internasionál iha Governu anteriór, atuál Diretór Jerál Turizmu, José Filipe Dias Quintas, informa iha tipu logo ko’alia sobre Timor-Leste no tenke firme ho naran ida ne’ebé loos mak Timor-Leste tanba Konstituisaun asegura.

“Hakerek iha ita-nia Lei Inan dehan Timor-Leste, la’ós Timor Lorosa’e, la’ós East Timor maibé bazeia ba ita-nia Konstituisaun temi dehan Timor-Leste entaun ita tenke firme ho ita-nia naran”.

Aléinde kór tolu ne’e iha liña ki’ik entre Timor ho Leste ho kór azúl ne’ebé reprezenta furak natureza tasi ne’ebé sai hanesan Timor-Leste nia produtu turístiku ne’ebé prinsipál.

“Timor-Leste nia produtu importante mak rekursu tasi nian kona-ba luku tasi, biodiversidade tasi laran tanba hanesan nasaun-illa iha pasífiku, produtu importante mak kona-ba kosteira”.

José hatutan molok MTAK halo promosaun ba rai-liur, timoroan mak tenke koñese uluk nia marka duké gasta osan barak halo promosaun iha estranjeiru maibé timoroan rasik lakoñese nia marka rasik.

“Ho ida ne’e liuhusi mídia sira habelar informasaun ne’e to’o iha ita-nia maluk sira iha área rurál. Ami mós sei ko’alia hamutuk ho maluk setór privadu sira husu sira-nia  hanoin oinsá ita halo promosaun liliu kona-ba ita-nia marka”.

Maski infraestrutura no atendimentu seidauk di’ak maibé halo ona prmosaun tanba MTAK nian haree katak importante tebes bainhira promove nasaun nu’udar país ida seguru atu atrai ema mai.

“Kona-ba atendimentu no seluk ne’e buat ketak ida maibé hanesan nasaun foun hahú konserteza buat sira ne’e hotu-hotu hasoru maibé importante mak ema koñese lai Timór ne’e iha ne’ebé? Ne’e mak ami-nia objetivu prinsipál para kria kona-ba marka ida ne’e”.

Marka Turizmu ida ne’e ho nia slogan badak ne’ebé sei atrai turista sira mak hanesan “Explore the Undiscovered” ka Esplora Fatin Ne’ebé Seidauk Hetan signifika oinsá Timor-Leste bele promove nia destinu turístiku ne’ebé sei foun no nurak ba iha mundu.

Notísia relevante : Governu Aprova Marka Turizmu Timor-Leste

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here