Diretor Jeral MOP, Rui Hernani. Imajen/Florêncio Miranda Ximenes.

DILI, 21 outubru 2019 (TATOLI) – Governu liuhosi ekipa téknika interministeriál finaliza ona konsulta públika ba abitante afetada konstrusaun estrada iha área rotunda Komoro to’o Tasitolu no tama ona faze identifikasaun ba propriedade sira hanesan uma no ai-horis.

Ekipa téknika liña ministeriál ne’e kompostu husi Ministériu Obra Públika (MOP), Ministériu Agrikultura no Peska (MAP), Ministériu Justisa liuhosi Sekretáriu Estadu Terras no Propriedade, Ministériu Administrasaun Estatál no Autoridade lokál sira.

“Ami finaliza ona prosesu konsulta públika, agora tama ba faze identifikasaun ne’ebé komunidade afetada parte súl ka estrada leten (foho nia ne’e) nia remata ona, agora estrada parte kraik nia mak afetadu barak liu entaun, sei lori tempu loron-rua ka tolu para finaliza”, Diretór Jerál MOP, Rui Hernani, afirma iha knaar fatin Faról, ohin.

Rui Hernani friza ekipa téknika liña ministeriál presiza loron 15, hodi hala’o identifikasaun tanba rezidente afetada barak hela iha ne’ebá.

“Ita presiza hala’o identifikasaun, depois identifikasaun ita sei prepara dokumentu no hala’o avaliasaun hodi fó indemnizasaun ba komunidade sira atu husik fatin ne’e hodi empreza bele hala’o konstrusaun ba estrada ne’e”, katak.

Nune’e, nia dehan ekipa interministeriál kontinua halo negosiasaun ho abitante kuaze 200-resin ne’ebé afetadu ba haluhan estrada Tasitolu- Rotunda hodi haree ba propriedade abitante liuliu uma no ai-horis .

“Ita hala’o konsulta públika ne’e komunidade barak mak hakarak muda sai husi fatin ne’e, maibé tenke kria kondisaun ka fó indemnizasaun, ne’ebé ita presiza halo identifikasaun hafoin fó pagamentu”, nia afirma.

Diretór Jerál MOP ne’e salienta ekipa téknika presiza halais prosesu ne’e tanba tuir kontratu projetu ne’e remata iha fulan ne’e (outubru).

“Ita hakarak halais ba prosesu ne’e, maibé presiza negosia ho komunidade sira tanba sira mós iha direitu hetan indemnizasaun, hafoin husik fatin ne’e”, tenik.

Antes ne’e, Ministru Obra Públika (MOP), Salvador Eugénio Soares dos Reis Pires, orienta ba ekipa interministeriál atu halais prosesu identifikasaun ba propriedade abitante iha Rotunda Komoro to’o Tasitolu.

Nia adianta Governu iha responsabilidade tenke preparadu kondisaun infrastrutura liga ba estrada, molok portu Tibar tama operasaun iha 2021.

“Kuandu portu ne’e tama iha operasaun, infrastrutura ne’ebé tama iha akordu ne’e Governu tenke prepara prontu ona ba sustenta operasaun portu Tibar nian entaun ida ne’e urjente uitoan se lae Governu kona multa rihun U$50 kada loron”, nia dehan.

Estrada Tasitolu to’o rotunda Komoro ne’e, kuaze kilómetru rua hamutuk ho pakote estrada Tibar-Tasitolu ne’ebé ka’er husi kompañia internasionál China Wuyi ho kustu millaun $12-resin, hahú iha loron 28 fevereiru 2017 to’o outubru 2019.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here