DILI, 20 outubru 2019 (TATOLI)—Koordenadór Rede Kreatividade Fotografu (REKREATIF), Acacio Pinto, informa Governu Timor-Leste liuhusi Sekretáriu Estadu Komunikasaun Sosiál (SECOMS) fó apoiu ba Rede Kreatividade Fotografu reprezenta Timor-Leste ba partisipa feira fotografia, pintura, no materiál kulturál Internasionál iha Biennale Ekotorial 5 Yogyakarta-Indonésia.

Feira fotografu Internasionál ne’ebé ho tema “Pinggiran” ne’e, hala’o iha Salaun Centru Kulturál Universitas Gadjah Mada (UGM) Yogyakarta (Jogja)-Indonézia loke ba públiku iha sábadu (19/10/2019). Feira ne’e hala’o ho objetivu atu promove Timor-Leste nia kultura ba mundu liuhusi fotografia.

“Objetivu husi feira Internasionál ne’e atu promove Timor-Leste nia kultura liuhusi arte fotografia hodi lekar ba mundu liuliu ba komunidade Indonézia katak Timor-Leste mós iha kultura ne’ebé orijin no úniku,” dehan Koordenadór REKREATIF Timor-Leste, Acacio Pinto, ba Ajénsia TATOLI liuhusi entrevsita via rede sosiál (wa), domingu (20/10/2019).

Grupu rekreativu.

Tanba ne’e, nia hatutan, nu’udar koordenadór nia lahaluha hato’o agradesimentu ba Governu Timor-Leste liuliu Sekretáriu Estadu Komunikasaun Sosiál no timoroan Cristovão da Costa ne’ebé fó apoiu ba sira hodi tuir eventu internasionál ne’e.

“Lori komunidade REKREATIF nia naran, ha’u hato’o obrigadu ua’in ba Governu Timor-Leste no individuál balun nia apoiu ba ami atu partisipa iha Feira Fotografia, Pintura, no Material Kulturál internasionál iha Jogja ne’ebé hahú husi abertura iha 20  outobru–30 novembru 2019 iha Jogja, Indonézia,” jornalista fotografu ne’e hateten.

Nia informa, membru REKREATIF na’in ida ne’ebé sai kuratór mak Adelio J. M. Ramos, artista mak hanesan Jenicia de Jesus, artista pintór mak Janiciia Silva da Jesus no Emelda Belina da costa Reis, artista fotografu mak Silvestre Rudiyanto Santos, Rofino Leandro Fereira, Adelino José Maria, Hipolito da Silva Batista. Artista na’in tolu kus ne’e hetan apoiu husi Governu Timor-Leste ho billete Dili-Jogja-Dili ba-mai.

REKREATIF partisipa feira ne’e, nia hatutan, hetan konvite direta husi Komisaun Organizadora husi Biennale Jogja iha Jogja-Indonézia. Iha feira ne’e mós REKREATIF sei halo Aprezentasaun kona-ba  materiál fotografia Kulturál, Pintura no  Material Kulturál ba públiku iha Jogja.

Artista sira, nia haklaken, ne’ebé tuir feira fotografia Internasionál ne’e hamutuk ema na’in 54 ne’ebé mai husi nasaun 12 mak Malázia, Myamnar, Singapura, Thailandia, Laos, Kamboja, Vietnam, Honkong, Taiwan, Filipina, Timor-Leste no artista husi uma-na’in Indonézia.

Nia deklara, REKREATIF hanesan Komunidade Fotografia iha Timor-Leste ne’ebé hetan ona oportunidade tuir eventu feira internasionál ba dala tolu (3). Oportunidade dahuluk, nia informa, sira ba tuir feira fotografia internasionál iha Tailándia iha tinan 2018 ho tema “Face Off Timor Leste”.

Oportunidade daruak, nia haktuir, REKREATIF partisipa iha diskusaun kona-ba “Art Colectif  Forum ASIA  ARISAN” iha Jogja-Indonézia iha 2018. Iha tinan ida ne’e (2019), REKREATIF hetan tan oportunidade hodi reprezenta Timor-Leste ba partisipa feira fotografia internasionál iha Biennale Ekotorial 5 Jogja durante fulan ida-nia laran.

Komunidade fotografia REKREATIF iha Timor-Leste ne’e harii iha tinan 2016 ne’ebé to’o oras ne’e halibur membru sira hamutuk ema na’in na’in 10. Komunidade REKREATIF ne’e hari husi fundadór na’in neen (6) mak Acacio Pinto, Hipolito da Silva, Eligio Monis do Rego, Salvador da Costa, Gil Barros de Jesus no Henriqueta M. da Silva.

Jornalista: Cancio Ximenes

Editór .     : Rafy Belo

HAKEREK NO HATÁN

Please enter your comment!
Please enter your name here