Estádiu Café Ermera. Imajen Tatoli/Hortençio Sanchez

DILI, 18 outubru 2019 (TATOLI) – Liga Futeból Amadora (LFA) sei realiza jogu ikus ba époka 2019 iha sábadu (19/10), ne’ebé ekipa Lalenok United FC no AD SLB Laulara sei hasoru malu iha Estádiu Café de Ermera.

Ba asuntu ne’e, Diretór Kompetisaun, Martinho Ribeiro, husu ba públiku hotu atu bele partisipa iha jogu refere.

“Aban hanesan jogu ikus époka 2019 no hanesan jogu super Tasa, ne’ebé sei hasoru malu entre ekipa rua hanesan ekipa kampiaun liga no ekipa Runner-up Tasa 12 Novembru. Ho nune’e, ami husu públiku no hadomi na’in futeból sira hotu atu bele partisipa direta iha jogu ne’e hodi fó suporta. Jogu ne’e rasik sei hala’o iha tuku 16:00 lorokaik”, tenik Martino Ribeiro iha Salaun Xanana Sport Centre, sesta ne’e.

Jogu ne’e sei dirije hosi árbitru Pedro Carvalho, juíz liña mak Antonio Carvalho, Filomeno da Silva, Francisco Pereira no árbitru rezerva mak Romário Malitety.

Iha parte seluk, ofisiál Lalenok United, Domingos Hornai, hateten Lalenok preparadu atu manán iha jogu ne’e.

“Ami preparadu atu manán jogu aban. Ami hakarak tinan ne’e tasa tolu iha ami-nia liman hodi marka istória loloos”, dehan Domingos.

Jornalista: Hortencio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here