Diretór DNDI, Estevão da Costa Belo(Karuk) SEKOMS Hamutuk Ceo Media Group, Moh Mirdal Akib (Loos), SEKOMS ho Media Group Metro Tv Asina Akordu ba Formasaun joranlista. Iha Gabinete Sekoms

DILI, 18 outubru 2019 (TATOLI)-Governu Timor-Leste liuhusi Sekretáriu Estadu Komunikasaun Sosiál (SEKOMS), ohin, asina MoU (Memorandum of Understanding) ho empreza televizaun privada Indonézia, Metro TV, iha Palásiu Governu.

Objetivu husi MoU ne´e mak fó kapasitasaun ba jornalista sira no funsionáriu sira iha SEKOMS.

Sekretáriu Estadu Komunikasaun Sosiál, Merício Juvenal dos Reis Akara. Imajen /Tatoli

“Ne´e momentu importante los tanba ita selebra kolaborasaun, ita asina MoU entre Metro TV ho Governu Timor liuhusi Sekretáriu Estadu Komunikasaun Sosiál ho Fundu Dezenvolvimentu Kapital Humanu,” hateten, Sekretáriu Estadu, Merício Juvenal dos Reis “Akara”, ba jornalista sira.

Governante ne´e konfirma katak iha tinan ne´e SEKOMS iha polítika iha foun, hakarak lori péritu mai Timór atu fó formasaun ba jornalista sira iha rai laran. “Benefisiariu, ema barak bele tuir no orsamentu bele sirkula nafatin iha ita-nia rai no ita aproveita seluseluk”.

Asinatura MoU entre SEKOMS ho Metro TV ne´e foin primeravez. “Ne’e pasu importante atu kontinua ba oin” nia subliña.

Sekretáriu Estadu Komunikasaun Sosiál, Merício Akara informa katak asinatura MoU ne´e la´ós ho Metro TV de´it maibé apoia mós parseiru sira ne´ebé mak atu implementa hanesan AJTL (Asosiasaun Jornalista Timor-Leste), LELI inklui mós TLPU (Timor-Leste Press Union) atu ajuda governu hodi kapasita ita-nia jornalista sira.

Metro TV sei fó trainementu espesífiku ba jornalista timoroan sira ne´ebé mak halo kobertura iha Palásiu Governu no Palásiu Prezidente. Mídia palásiu mak sei sai alvu prinsipál depois hotu mak avansa ba formasaun seluk.

“Metro TV iha kapasidade, sira iha naran, iha Indonézia, sira hatene oinsá halo kebertura di’ak, halo reportajen lalais liu breaking news (última hora) ne’ebé lalais. Entaun, ita tenke aproveita kapasidade hirak ne’e, esperensia hirak ne’e,” konsidera governante ne’e.

Nia reforsa, husi formasaun ne’e, materia importante mak oinsá halo kobertura tuir padraun internasionál ne´ebé mak protokoler palásiu nian kumpre.

“Depois fó kobertura ida ne’ebé iha kualidade, transmite informasaun ne’ebé lalais iha kredibilidade, iha kapasidade atu foti filmajen, fotografia ne’ebé di’ak; treinamentu avansadu (advance training) ba sira”.

Governante ne’e informa tan katak formasaun ne’e: “Ita hanoin para jornalista na’in 25 ba leten, sei aumenta. Maibé, ba faze primeiru ita hanoin na’in 25 ba leten, depende kondisaun espasu mak ita iha maibé ita preve ona ba na’in 25 ba leten kada sesaun kada trainementu”.

Jornalista : Nelia Fernandes

Editór         : Rafy Belo

HAKEREK NO HATÁN

Please enter your comment!
Please enter your name here