Estudante Escola Secundária Nobel da Paz. Imajen/TATOLI

DILI, 18 outubru 2019 (TATOLI)-Estudante Finalista programa siénsia naturál na’in 19 husi Eskola Ensinu Sekundáriu Jerál (ESG) Nobel da Paz la tuir ezame nasional sein justifikasaun.

“Ita laiha sira-nia númeru kontaktu tan ne’e difisil atu halo ligasaun ho estudante na’in 19 ne’e to’o agora,” konfirma Diretór ESG Nobel da Paz, Pedro Nunes Menezes ba Ajénsia TATOLI iha nia serbisu fatin, ESG Nobel da Paz, Quintal Boot, Dili, ohin.

Nia hatutan, estudante sira ne’e la halo jusifikasaun to’o agora tanba saida mak sira la partisipa iha ezame nasionál

“Ita hein hela sira nia prejenza maibé tama ona loron lima estudante na’in 19 ne’e ida mós seidauk hasoru parte eskola,” insiste manorin na´in ne´e.

Nia dehan, karik estudante  na´in 19 latuir ezame nasionál tanba razaun propina karik bele mai hasoru parte eskola.

Tanba, antes ne’e, parte eskola anunsia ona  ba estudante finalista sira katak molok atu tuir ezame nasionál tenke kompleta ona propina mak bele tuir ezame. Propina eskola ESG Nobel da Paz nian kada fulan  dolár lima 5. “Ha’u hanoin propina husi eskola sira seluk nian parese boot liu ami nian 5 dolár de’it. Se sira la mai tanba kestaun propina loloos mai hato’o razaun”.

Maske nune´e, tuir Diretór Pedro Nunes Menezes estudante na’in 19 la mai tuir ezame nasionál ne’e la´ós kestaun propina. “Agora estudante na’in tolu husi siénsia sosiál mak ohin mai aprezenta aan ba eskola tanba sira la partisipa iha ezame nasionál ba loron dahuluk nian”.

Entertantu ezame tuir mai, sira kompleta hotu. “Entaun estudante na’in tolu ne’e sei iha oportunidade segunda xamada atu kompleta ezame nasionál. Maibé sei realiza iha nasionál hahú segunda feira loron 21 outubru 2019”.

Totál estudante finalista ESG Nobel da Paz ne´ebé partisipa iha ezame nasionál ne´e mak estudante na´in 881 husi totál estudante 900. Númeru  estudante 900 ne´e menus ba estudante na´in 881 tanba na´in 19 la partisipa ezame sein justifikasaun.

Jornalista : Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here