Semináriu Nasionál OMS. Foto TATOLI: Felicidade Ximenes

DILI,17 outubru 2019 (TATOLI)-Reprezentante Organizasaun Mundiál Saúde (OMS) iha Timor-Leste, Rajesh Pandav hateten, informasaun rigoroza no konfiável mak fundasaun di’ak hodi foti desizaun iha sistema saúde nia laran no atu determina progresu ba Kobertura Saúde Universál

“Objetivu Dezenvolvimentu Sustentavel sei presiza nasaun nian sistema informasaun ba saúde ne’ebé maka forte atu fornese dadus ne’ebé iha kualidade, loloos no konfiável ba taxa mortalidade, morbidade, fatór risku, servisu kobertura nune’e mós ho kapasidade sistema saúde no prontidaun,” dehan Reprezentante OMS, Rajesh Pandav iha Hotel Timor, ohin.

Tuir nia, lejisladór no jestór sira presiza asesu, presiza hetan asesu ba informasaun ne’ebé iha kualidade, atu nunee bele identifika problema no nesesidade no foti desizaun bazeia ba evidénsia kona-ba polítika, alokasaun rekursu no ba responsabilidade. Sistema informasaun saúde ne’ebé diak presiza atu garante katak informasaun ne’e relevante, konfiável, iha influénsia, funsiona no iha komprensaun.

Timor-Leste introdús ona sistema informasaun saúde bazeia ba web liuhusi plataforma no Sistema Informasaun Saúde Timor-Leste iha tinan rihun rua sanulu resin lima 2015.

Implementasaun husi plataforma bazeia ba web ida ne’e hodi bele jere dadus saúde ho rutia ne’ebé maka suporta husi OMS no parseiru sira seluk hanesan UNICEF, DFAT, Banku Mundiál no sira seluk.

Inisiativu ida ne’e kontribui ona ba prosesamentu no kolesaun dadus ne’ebé efikás, hasa’e asesu fasil ba dadus no instrumentu analítiku ne’ebé maka permite tendénsia ba analize, komparasaun dadus iha fasilidade hotu, no iha distritu no progresu monitorizasaun hasoru meta ne’ebé define tiha ona. “Ita presiza fó esforsu tomak hodi garante katak plataforma informasaun ida ne’e no Rekursu Umanu no kapasidade institusionál tenke kontinua reforsa beibeik”.

Rajesh pandav relata, iha tinan 2015 OMS suporta Ministériu Saúde ba inisiativu ida ne’e dezenvolve estratéjia nasionál saúde hodi bele fornese kuadru kompreensivu ba utilizasaun ne’ebé seguru no efikás iha área teknolojia informasaun no komunikasaun.

Hanesan ita hotu hatene ona, teknolojia informasaun no komunikasaun ne’e agora aumenta bo’ot ho lalais. Iha ona instrumentu dijitál oioin ne’ebé mak bele suporta ita-nia prestasaun servisu saúde, jestaun ba programa, vijilánsia, monitorizasaun no peskiza.

Ita presiza hasa’e saida mak ita bele aprende husi ita-nia falla no susesu husi implementasaun saude oi-oin no halo esforsu tomak ba abordajen ne’ebé rigorozu no kompreensivu.

“Ita tenke garante katak ita-nia esforsu ne’e sustentadu no interpreta ba asaun ida ne’ebé maka bele hadi’ak sistema informasaun saúde, asesu di´ak liu hodi bele suporta desizaun ba saúde iha nivel servisu hotu-hotu, no ikus liu, atu bele avansa ba Kobertura Saúde Universál no mós alkansa Objetivu Dezenvolvimentu Sustentavel,” nia dehan.

Reprezentante OMS ne´e kompromete, OMS sei kontinua fó apoiu ba rekursu tékniku no ba Ministériu Saúde ba dezenvolvimentu no finalizasaun mapamentu ba sistema informasaun saúde.

“Ohin parseiru sira mai partisipa iha workshop ida ne’e, hatudu katak ita-nia servisu hamutuk no kompromisu forte atu hadi’ak sistema informasaun saúde iha Timor-Leste. Ha´u-nia dezeju ba imi hotu atu iha diskusaun di´ak no hein katak bele hetan solusaun ida husi workshop ida ne’e,” nia konklui.

Jornalista: Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here