Agresaun fízika. Ilustrasaun

DILI, 17 outubru 2019 (TATOLI)-Estudante Eskola Sekundáriu Jerál (ESG) Nobel da Paz ida ho inisiál MSG hetan agresaun fízika husi ema deskoñesidu iha área Quintal Boot no agora estudante ne’e evakua ona ba Ospitál Nasional Guido Valadares (HNGV) hodi hetan tratamentu intensivu.

Vítima ho inisiál MSG nu´udar Estudante ESG nobel da Paz ne’ebé foin ramata ezame nasionál  no hamutuk ho ninia kolega sira hein hela Mikrolet iha área fronteira entre Quintal boot ho Mascarenhas, derepente de’it mosu deskoñesidu balun halo kedan asalta ba estudante Nobel da paz sira no rezulta vítima hetan kanek iha ninia ibun no ulun.

Estudante Nobel da Paz ida ho inisiál JdS ne´ebé mós sai vítima ba asaun ne´e ba Ajénsia TATOLI konfirma katak sira hamriik hamutuk ho vítima ne´ebé evakua ona ba ospitál, derepenti de´it grupu ida mai no besik mai no sira la deskonfia maibé derepente ataka sira.

“Ami hein hela mikrolet atu fila ba, uma grupu sira ne’e asaltu ami derepente de’it, ami konsege halai maibé kolega M (inisiál) mak sira tuku no tebe kona iha nia ibun, rezulta nia monu, baku ulun ba fatuk. Nia ran sai barak,” estudante Nobel da Paz ne´e haktuir kronolojia, iha área Quintal Boot, kinta (17/10/2019).

Tuir estudante ne’e katak vítima estudante ESG Nobel da Paz ne´e hetan pankada maka´as iha ninia ulun. Tanba nia hetan tebe hodi monu ba rai naruk iha aredór Defensoria Públiku nian. Vitima nia ulun  baku ba fatuk nia ran sai maka´as.

“Maibé husi apoiu kolega sura seluk vítima evakua kedan ba HNGV,” haktuir estudante ne´e.

Kondisaun jerál estudante ESG Nobel da Paz nian iha HNGV, jornalista TATOLI sei kontinua hela atualiza iha terenu.

Jornalista : Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here