Prezidente Federasaun Taekwondo Timor-Leste, Angelo Neves. Imajen Espesiál

DILI, 17 outubru 2019 (TATOLI) – Prezidente Federasaun Taekwondo Timor-Leste (FTTL), Angelo Neves, hateten atleta Taekwondo na’in-neen preparadu reprezenta Timor-Leste hodi partisipa iha jogu internasionál Sudeste Aziátiku (Sea Games), ne’ebé sei realiza iha 30 novembru to’o 11 dezembru 2019 iha Manila, Filipina.

“Atleta sira ninia preparasaun la’o normál hela hanesan baibain. Atleta hamutuk na’in-neen maka sei partisipa iha eventu ne’e, kompostu husi atleta mane na’in-tolu no feto na’in-tolu”, tenik Angelo ba Agência Tatoli, kinta ne’e.

Nia dehan, fasilidade treinu maka sei sai problema uitoan, tanba ne’e federasaun esforsu-aan rasik tuir kbiit ne’ebé iha.

“Fasilidade ami-nian ne’ebé atleta sira hodi hala’o treinamentu, federasaun maka sei prepara rasik tuir kbiit limitadu. Ami la hetan apoiu hosi Konfederasaun Desportiva Timor-Leste no Komité Olímpiku Timor-Leste”, nia akresenta.

Angelo Neves haktuir, atleta feto na’in-tolu hirak ne’ebé sei reprezenta nasaun, hahú kedas sira-nia treinamentu iha agostu 2015 liubá, enkuantu mane na’in-tolu foin maka hahú treinamentu fulan neen.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here