Atividade merkadu iha merkadu Bauknana, suku Beneufe, sub rejiaun Nitibe-RAEOA. Imajen Jogerjo Guterres

OEKUSI, 17 outubru 2019 (TATOLI) – Rai-manas, rai-uut, ai-mahon, lona, no baraka ho tali-tahan mak ‘satan’ atividade merkadu Baoknana, suku Beneufe, sub rejiaun Nitibe, Rejiaun Administrativa Espesiál Rejiaun Oekusi Ambenu (RAEOA).

Domingos Falo (42), vendedór tabaku. Imajen Jogerjo Guterres

“Koitadu, ami fa’an produtu tuur de’it iha ai-hun, no kuandu iha tempu udan, susar tebes ba ami tanba tahu maka’as”, haktuir Domingos Falo (42) ba Tatoli.

Maske fa’an de’it tabaku, nia propoin ba autoridade atu tau atensaun ba kondisaun merkadu ne’e, nune’e vendedór sira bele hetan fatin di’ak.

Paulina Taek (47) kada kuarta lori tua sabu litru 10 husi suku Oenunu, no fila ho dolar ualu to’o $10 ne’ebé fa’an iha merkadu ne’e hateten, tempu naruk ona sira negosiu iha bazar nee, maibé laiha kondisaun ne’ebé di’ak.

Paulina Taek (47), vendedora tua sabu hosi suku Oenunu. Imajen Jogerjo Guterres

Nia haktuir, populasaun maihusi suku hotu iha Oekusi hodi fa’an produtu iha bazar ne’ebé semana ida dala ida, maibé tuur deit iha ai-hun, no rai-rahun maka’as.

Nia dehan, balun ho inisiativa halo baraka atu tahan loron manas, maibé sira ne’ebé maihusi fatin dook, tenke tuur habai án ho produtu iha loron manas. Esforsu ne’ebé nia halo hodi selu oan sira-nian eskola.

Vendedora Francisca Sombai (37) mai husi suku Suniufe, aldeia Oenunu ne’ebé fa’an kábas iha merkadu Baoknana. Imajen Jogerjo Guterres

Nune’e mós Francisca Sombai (37) mai husi suku Oenunu ne’ebé fa’an kábas hateten, sempre tuur deit iha loron manas, tanba oan sira-nian nesesidade eskola.

Inan ho oan nain-lima ne’ebé tuur hotu iha banku edukasaun ne’e husu ba autoridade atu buka solusaun ba kondisaun merkadu ne’e.

Totál populasaun Beneufe 2,801, kompostu aldeia Citrana ema nain 993, Lamasi 736 no Manan 1,072. Beneufe parte sub rejiaun Nitibe ho númeru populasaun 12,273. Alende Beneufe, suku seluk hosi Nitibe maka; Banafi, Lelaufe, Suniufe, Usitako.

Jornalista : Cipriano Colo

Editora: Rita Almeida

HAKEREK NO HATÁN

Please enter your comment!
Please enter your name here