Primeiru-Ministru, Taur Matan Ruak, prezide Reuniaun Konsellu Ministru iha Palásiu Governu, Dili, Kuarta (16/10/2019). Imajen TATOLI/Egas Cristovão

DILI, 16 outubru 2019 (TATOLI) – Governu liuhosi reuniaun Konsellu Ministru kuarta-ne’e, asiste no halo apresiasaun ba aprezentasaun husi Ministru Defeza no Seguransa, Filomeno Paixão de Jesus ho Kapitaun Fragata, Higino das Neves, kona-ba kriasaun Sistema Autoridade Nasionál Marítima (ANM).

Ministru Estadu Prezidénsia Konsellu Ministru, Hermenegildo Augusto Cabral Pereira, hateten aprezentasaun ne’e la’ós buat foun maibé inisia ona iha tinan kotuk.

Notísia Relevante: Ministru Defeza Halo Hela Análize Ba Autoridade Marítima

“Konsellu Ministru apresia tebes ba aprezentasaun ne’e no fó opsaun tolu ba Konsellu Ministru hodi haree pro no kontra maibé to’o ikus Konsellu Ministru rekomenda ba Ministru Defeza no Seguransa atu halo abordájen ho entidade relevante iha nasaun ne’e, hodi hakle’an liután konpensaun iha ita-nia setór interiór, alfándega no elementu sira iha sistema ida-ne’e. Bainhira bele entende kle’an ona maka bele lori fila mai hodi hetan aprovasaun”, tenik governante-ne’e.

Governu konsidera tasi hanesan identifikasaun iha estratejia nasionál no fundamentál ba dezenvolvimentu nasaun.

Notísia Relevante: TL Presiza Autoridade Marítima Hodi Kontrola Tasi

Nune’e, ezekutivu sira sei estuda kle’an proposta ne’ebé iha ho objetivu atu fó poténsia ba pozisaun jeo-estratéjika nasionál, ho jestaun ne’ebé efikáz husi rekursu ezistente iha espasu marítimu no asume responsabilidade Estadu ba kosteiru seguransa marítima no protesaun meiu ambiente.

Jornalista: Hortençio Sanchez

Editór: Xisto Freitas

 

HAKEREK NO HATÁN

Please enter your comment!
Please enter your name here