PNTL kaer hela Suspeitu ho inisial CDJ ne'ebè lori motor tenta soke aviaun Sriwijaya Iha Aeroportu Internasionál Prezidente Nicolau Lobato, Comoro, Dili, Segunda (14/10/2019). Imajen/Eugenio Pereira

DILI, 16 outubru 2019 (TATOLI) – Tribunal Distritál Dili (TDD) liu husi primeiru interrogatóriu, ohin, aplika medida koasaun prizaun preventiva ba arguido CDJ, ne’ebé lori motor atu soke aviaun Sriwijaya Air iha Aeroportu Internasionál Prezidente Nicolau Lobato, Comoro, segunda (14/10/2019).

Notísia Relevante :Search Soke Aviaun Suspeitu Uza Motor Atu Soke Aviaun Sriwijaya La’ós Joven 

Razaun tribunal aplika medida koasaun ne’e, tanba iha indísiu forte arguido komete krime tanba atu soke aviaun. Maske nune’e, parte defeza preokupa ho kondisaun saúde arguido nian, tanba iha audiénsia arguido deklara katak Maromak mak haruka nia halo asaun ne’e.

“Ha’u haree iha despaixu tribunal nian hateten prizaun preventiva, maibé tuir loloos tribunal mós bele aplika medida seguransa internamentu, tanba arguido nia kondisaun mental ladún di’ak no nia hatán ho arbiru de’it no nia dehan tama iha aeroportu ne’e Maromak mak haruka signifika ema ne’e ladún normal,” informa defensór públiku, Sebastião Amado de Almeida, ne’ebé fó asisténsia legal ba arguido.

Nia sujere halo ezame médiku ba arguido hodi hatene kondisaun mental arguido nian no sei iha tempu loron 15 hodi estuda no haree atu halo rekursu ou lae.

Iha primeiru interrogatóriu ne’e, Ministériu Públiku promove arguido ba pratika krime tama iha fatin seluk ne’ebé taka ba públiku no atentadu ba seguransa e transporte ne’ebé previstu iha artigu 186, 210 husi kódigu penal Timor Leste.

Audiénsia julgamentu prezide husi Juiza Maria Solana, Ministériu Públiku reprezenta husi Prokuradora Lidia Soares no arguido hetan asisténsia legal husi defensór públiku Sebastião Amado de Almeida.

Jornalista : Domingos Piedade Freitas

Editór       : Francisco Simões

 

 

HAKEREK NO HATÁN

Please enter your comment!
Please enter your name here