Vensedór Kompetisaun Planu Negósiu Inovativu (KPNI) 2019, Cornelio Gago. Imajen TATOLI/Antónia Gusmão.

DILI, 16 outubru 2019 (TATOLI) – Cornelio Gago hosi Munisípiu Ermera sai vensedór ba Kompetisaun Planu Negósiu Inovativu (KPNI) 2019 ne’ebé realiza hosi Institutu Apoiu Dezenvolvimentu Emprezariál (IADE) ba daneen.

Ideia inovadora ne’ebé lori Cornelio sai manán-na’in ba kompetisaun ne’e mak transforma ai-samtuku kulit sai ai-kulat mutin.

Patrosinodór hanesan empreza ConocoPhillips, Bayu Undan no Timor Telecom, no Xefe Gabinete Ministru Koordenadór Asuntu Ekonómika (MKAE), no mós Diretór Ezekutivu IADE, Filomeno Marcelino Belo, hasai foto hamutuk ho manán-na’in ba KPNI 2019, iha Timor Plaza, Kuarta (16/10/2019). ImajenTATOLI/Antónia Gusmão.

Nune’e, vensedór ne’e kompromete atu kontinua nia negósiu ne’e hakat bá oin. “Ha’u prontu atu kontinua nafatin ha’u-nia negosiu bá oin, negósiu ne’e inovativu ba liu área agrikultura nian, entaun ne’e hanesan dezafiu ida ba ami atu haboot no habelar bá oin”, Cornelio Gago promete hafoin nomea nia sai manán-na’in no sente orgullu tebes ba eventu ne’e iha Timor Plaza, ohin.

Entrentu, sai segundu lugar ba KPNI mak Leonia Lemos no vensedór datoluk mak José Soares.

Manán-na’in tolu ne’e hetan prémiu hanesan tasa, ai-funan, no prémiu estra hosi empreza Timor Telecom (TT) hanesan telefone ho kartaun (sim card).

Ba na’in-hitu ne’ebé la manán komisaun organizadora atribui de’it sertifikadu apresiasaun ba sira.

Eventu ne’e hetan apoia hosi empreza internasionál ConocoPhillips, Bayu undan ho Timor Telecom.

Diretór Ezekutivu ConocoPhillips iha Timor-Leste, José Lobato, hato’o parabéns ba manán-na’in sira atu kontinua hala’o atividade bá oin.

“Ha’u lori ConocoPhillips no Bayu Undan nia naran hato’o parabéns. Ha’u halo observasaun dezde ami hahú apoia eventu ne’e, planu negósiu barak liu ba hahán, maibé ne’e di’ak tanba halo negósiu ba hahán persiza orsamentu ki’ik más ho marjen ne’ebé boot. Negósiu hanesan petróleu persiza orsamentu boot, maibé manán ne’e ladún boot maka porsentu 12 to’o de’it 15”, hateten José Lobato iha serimónia enserramentu KPNI ne’e.

Prezidente Juri ba KPNI, Aurerito Knuth Bahan Rodrigues, salienta bazeia ba kritéria no avaliasaun hosi ekipa juri maka hanesan konteúdu hosi planu negósiu inovativu, no mós karater hosi kompetidór sira iha aprezentasaun nian

“Desizaun hosi juri sira katak ne’e loos, justu no onestu”, dehan Prezidente Juri ba KPNI 2019.

Orsamentu ba atividade ne’e apoia hosi patrosinadór hanesan ConocoPhillips hamutuk rihun $25 no husi IADE rasik mak liuhusi Orsamentu Jéral Estadu hamutuk rihun $143.

Aléinde ne’e Timor Plaza mós oferese fatin hodi realiza eventu sira relasiona ho KPNI nian.

Notísia relevante : Kompetidór Na’in-10 Kompete iha Planu Negósiu Inovativu ba Daneen

Kompetisaun Planu Negósiu Inovadór Atu Motiva Joven iha Negósiu

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here