Eis Sekretáriu Sub Rejiaun Haksolok Oekusi, Martinho da Cunha ho naran kódigu 'Mala', esplika giaun validasaun ba verifikadór sira iha salaun RAEOA. Imajen TATOLI/Cipriano Colo

OEKUSI,15 outubru 2019 (TATOLI) – Reprezentante veteranu husi suku 18 iha Rejiaun Administrativa Espesiál Oekusi Ambenu (RAEOA), oras ne’e prepara aan atu simu pose hodi verifika lista kandidatu benefisiáriu ba kombatente ne’ebé rejistu iha faze daruak, 2009 ho totál 3.961.

Eis Sekretáriu Sub Rejiaun Haksolok Oekusi, Martinho da Cunha, ho naran kodigu ‘Mala’, haktuir objetivu enkontru ohin ne’ebé hala’o iha salaun RAEOA, Santa Rosa atu halo juramentu ida ba elementu sira ne’ebé sei sai verifikadór ba dadus ne’ebé rejistu iha 2009.

Nia dehan, molok hahú halo verifikasaun, ohin komisaun fó esklaresimentu balun kona-ba mekanizmu entrevista ba membru sira.

“Sira mai atu simu instrusaun uitoan, bainhira remata iha loron ne’e nia rohan, sira sei halo juramentu molok hahú hala’o servisu”, esplika Mala.

Nia informa liután, verifikadór sira ne’ebé atu halo juramentu hamutuk 54, husi suku 18, mai husi reprezentante husi kada suku ema na’in tolu.

Alende ne’e, aumenta mós ho reprezentante husi zona haat hamutuk nain ualu ho nia reprezentante kada zona nain rua, ne’ebé antes ne’e simu ona juramentu iha nasionál.

Kona-ba materia ne’ebe oferese, Mala hatutan sei haree ba estatutu Kombatente Libertasaun Nasionál, tanba orientasaun hotu-hotu bazea ba estatutu ne’e rasik, nu’udar mata dalan ba verifikasaun dadus.

Tuir oráriu ba verifikasaun dadus iha Oekusi ba segundu rejistu iha tinan 2009, sei hahú iha loron 15 outubru 2019 to’o 20 fevereiru 2020.

Entretantu, bazea ba lista rejistu kandidatu veteranu husi Oekusi iha periudu daruak, iha kandidatu hamutuk 3.961.

Tuir livru 3-C Orsamentu Jerál Estadu (OJE) 2019 RAEOA-ZEESM haktuir benefisiáriu ne’ebé hetan apoiu osan Estadu iha RAEOA ba kombatente ou veteranu libertasaun nasionál ema na’in 363 no martires libertasaun nasionál ema 223.

Jornalista: Cipriano Colo

Editora: Rita Almeida

HAKEREK NO HATÁN

Please enter your comment!
Please enter your name here