Prezidente Sensu Agríkola 2019, Elias dos Santos Ferreira. Imajen/Jogerjo Guterres.

DILI, 15 outubru 2019 (TATOLI) – Prezidente Sensu Agrikultura 2019, Elias dos Santos Ferreira, informa dadus sensu agríkola iha territóriu Timor-Leste atinje ona porsentu 97, maibé ekipa téknika deside hodi extende tan to’o 30 outubru ba área enumerasaun balun ne’ebé seidauk hotu.

Razaun prolonga tanba iha Rejiaun Administrativa Espesiál Oekusi-Ambenu (RAEOA) no munisípiu balu seidauk finaliza tanba hahú tarde.

“Informa katak RAEOA mak atraza tanba sira hahú tarde iha loron 27 agostu, tanba ne’e sei finaliza iha 27 outubru, maibé munisípiu hothotu atinje ona porsentu 100”, hateten Prezidente Sensu Agrikultura 2019 ba Tatoli iha nia kna’ar fatin Kaikoli, ohin.

Elias dos Santos afirma, dadus sensu husi munisipiu balu porsentu boot ona mak hanesan Ainaru, Baukau, Dili, Lautein, Manatutu no Manufahi, ne’ebé sei falta porsentu rua ou tolu.

“Tanba ne’e maka ami-nia ekipa tékniku realiza enkontru no ami hein to’o aban lokraik hira loloos maka tama ona hodi nune’e ami bele halo estratéjia no área enumerasaun balu seidauk hotu ami-nia ekipa bele bá vizita. Ha’u fó ezemplu suku Madohi iha Dili nian hanesan suku foun ninia área enumerasaun ne’e 15, maibé finaliza ona sia no hela neen. Tanba ne’e maka ami sei extende tan, nune’e mós iha Lautein iha suku ida iha Tutuala, suku haat iha Ainaru, más la’ós suku tomak maibé iha suku ida ami fahe ba área enumerasaun ne’ebé bele iha umakain 105 to’o 150”, Elias esklarese.

Atuál Diretór Jerál Estatístika Ministériu Finansa ne’e dehan, razaun munisípiu sira sei hela porsentu rua ou tolu tanba realiza sensu tarde no ekipamentu hosi nasionál haruka ba munisipiu sira ne’e tarde, nune’e afeta ba sira-nia persentajen.

“Ekipa ko’alia ona katak extende tan loron sanulu no espera katak to’o loron 30 outubru no ami bele halo ona planu, no halo enserramentu iha munisípiu no nasionál para hatudu katak sensu remata ona no prosesu bá oin ekipa hosi dadus sei analiza dadus no iha tempu badak nia laran iha ona rezultadu preliminár nune’e halo diskusaun iha Parlamentu bele fó ona dadus agrikultura nian no fó ba Governu hodi halo planu ba dezenvolvimentu ba ita-nia nasaun”, dehan Elias.

Diretór ne’e hatutan tékniku sira utiliza android hodi ba entrevista ba umakain iha susesu boot no uza GPS sukat rai, tan ne’e dadus hatudu katak porsentu 75 uza GPS hodi sukat rai.

“Depois analiza dadus maka foin hatene loloos ita-nia rai ne’e ektare hira, natar ektare hira no oinsá ho produsaun. Agora seidauk fó sai tanba uza android bá halo sensu depois dadus ne’e manda kedas mai nasionál no halo apuramentu hodi fó sai rezultadu preliminár”, katak.

Biban ne’e, Elias agradese tebes ba kooperasaun autoridade tantu hosi munisípiu , suku to’o aldeia. Nune’e mós ba família umakain sira ne’ebé fó ona tempu hodi hasoru ekipa Sensu Agrikultura 2019 nian durante fulan rua.

Sensu agríkola ba dahuluk ne’e ofisialmente lansa iha Timor-Leste iha 13 agostu no iha loron 14 hahú kedan atividade ne’e no tuir planu remata iha 12 outubru 2019. Sensu ne’e hala’o hafoin Timor-Leste hamriik mesak nu’udar nasaun soberana ida, maski iha tinan sira antes Governu liuhosi Ministériu Finansa realiza ona sensu umakain.

Sensu agríkola 2019 ne’e, lansa hosi Ministru Agrikultura no Peska, Joaquim José Gusmão dos Reis Martins, ne’ebé mós reprezenta Primeiru-Ministru (PM), Taur Matan Ruak, Ministra Finansa interina, Sara Lobo Brites, akompaña  hosi Prezidente Tékniku Sensu Agríkola 2019, Elias dos Santos Ferreira, no Sekretáriu Estadu Formasaun Profisionál no Empregu (SEFOPE), Julião da Silva.

Programa sensu agríkola ne’e finansia ho Orsamentu Jerál Estadu (OJE) hamutuk millaun $5.

Pergunta ne’ebé uza iha sensu ne’e hamutuk 102, liuliu iha peska, floresta, rai, hakiak animál tantu ki’ik ka boot.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here