Prezidente Repúblika, Francisco Guterres Lú Olo, tersa ne'e, simu karta kredensiál hosi nasaun haat. Imajen Mídia PR

DILI, 15 outubru 2019 (TATOLI)–Prezidente Repúblika, Francisco Guterres Lú Olo, tersa ne’e, iha Palásiu Prezidente Nicolau Lobato, Bairru Pité, simu karta kredensiál hosi Embaixadór Estraordináriu no Plenipotensiáriu hosi Uniaun Europeia, Repúblika Helénica, Bosnia Herzegovina no Repúblika Eslováquia.

Xefe Estadu simu karta kredensiál hosi Embaixadór-sira Estraordináriu no Plenipoténsiáriu mak hanesan Andrew Jacobs hosi Uniaun Europeia, Costantina Koliou hosi Repúblika Helénica, Asmira Merdanovic Halilovic hosi Bosnia Herzegovina no Jaroslav Chlebo hosi Repúblika Eslováquia.

Iha oportunidade ne’e, Ministru Negósiu Estranjeiru no Kooperasaun, Dionísio Babo Soares, liuhusi Mídia Prezidénsia Repúblika ne’ebé Agência Tatoli asesu, esplika katak Uniaun Europeia mak iha kooperasaun ho Timor-Leste, maibé nasaun tolu sira seluk seidauk iha kooperasaun bilaterál. Iha de’it mak troka informasaun no apoiu malu iha organizasaun multilaterál sira.

Babo hateten katak kooperasaun ho Uniaun Europeia iha ámbitu atu hametin liután Após Akordu Cotonou ninian. Akodu Cotonou ko’alia kona-ba parseria entre Uniaun Europeia no nasaun en-dezenvolvimentu ba tinan-20 ne’ebé sei ramata iha 2020.

Hosi nasaun haat ne’e, Uniaun Europeia mak iha ninia rezidénsia iha Timor-Leste, enkuantu nasaun tolu seluk nu’udar embaixadór lahó rezidénsia, iha ne’ebé hala’o kna’ar hosi Jakarta, Indonézia.

Repúblika Helénica ka Grecia estabese relasaun diplomátika ho Timor-Leste iha 2003, ho Eslováquia iha 2014 no Bosnia Herzegovina iha 2015.

Edisaun: Xisto Freitas

HAKEREK NO HATÁN

Please enter your comment!
Please enter your name here