Ministra Finansa ein ezersísiu, Sara Lobo Brites. Foto: Media MF.

DILI, 15 outubru 2019 (TATOLI) – Governu liuhosi Ministra Finansa ein ezersísiu, Sara Lobo Brites, hamutuk ho Ministru Reforma Lejizlativa no Asuntu Parlamentár, Fidelis Leite Magalhães, submete ona Proposta Lei Orsamentu Jerál Estadu (OJE) ba Parlamentu Nasionál (PN) hodi diskute.

“Ohin ami mai submete Proposta Lei Orsamentu Jerál Estadu 2020 ba Parlamentu Nasionál, akompaña mós ho dokumentu ofisiál sira husi Governu”, tenik Sara Lobo iha resintu PN, tersa ne’e.

Notísia Relevante: Konsellu Ministru Aprova Proposta OJE 2020 Biliaun$1,950

Maski nune’e, Governante ne’e informa, dokumentu suplemetár sira maka hanesan livru 1 panorama orsamentu, livru 3 A, B, C, livru 4,5,6,7, no livru 2 hanesan livru ne’ebé deskreve kona-ba planu asaun annuál ne’ebé Ministériu Finansa serbisu hamutuk ho Unidade Planeamentu Monitorizasaun no Avaliasaun (UPMA) sei aprezanta iha loron 21 outubru.

“Ida ne’e orsamentu tuir kalendáriu normál. Loron hirak liubá, Prezidente Parlamentu mós estabelese ona kalendáriu indikativu ida ne’ebé tuir reuniaun ho komisaun sira sei realiza iha 22 outubru to’o 20 novembru”, nia akresenta.

Iha fatin hanesan, Prezidente Patlamentu Nasionál Arão Noé de Jesus da Costa Amaral, hateten PN simu ona Proposta OJE 2020 ho montante biliaun $1,950.

“Orsamentu Jerál Estadu 2020 no mós planu levantamentu hosi Fundu Petrolíferu biliaun $1,4 no restu hosi saldo 2019 hanesan mós ho tasa doméstika-nian no impréstimu-nian maka deskreve iha ne’ebá”, nia haktuir.

Tuir ajenda ne’ebé iha, aban sei haruka ona ba parte tékniku hafoin remata intrega hikas iha 21 outubru, no baixa ba komisaun hotu, nune’e iha loron 22 outubru komesa audiésia komisaun durante fulan ida nia-laran.

“Komisaun hotu mak ami foin tama fali ba jeneralidade, tuir kalendáriu sei to’o 10 dezembru maka aprovasaun finál no 11 dezembru maka sei haruka ona ba Prezidente Repúblika”, nia akresenta.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here